Indonezııadaǵy sý tasqyny: qaza tapqandar sany 303 adamǵa jetti

ASTANA. KAZINFORM – Indonezııanyń Sýmatra aımaǵyndaǵy úsh provıntsııada bolǵan sý tasqyny men laı kóshkini saldarynan qaza tapqandar sany 303 adamǵa jetti, taǵy 279 turǵyn iz-túzsiz ketti, dep habarlaıdy Sınhýa.

Indonezııanyń Tótenshe jaǵdaılar jónindegi ulttyq agenttiginiń (BNPB) basshysy Sýharıantonyń aıtýynsha, eń kóp adam shyǵyny Soltústik Sýmatra provıntsııasynda tirkelgen. Bul óńirde 166 adam kóz jumyp, 143 adam áli de iz-túzsiz joǵalǵandardyń qatarynda.

Batys Sýmatra provıntsııasynda 90 adamnyń qaza tapqany rastaldy, 85 turǵyn joǵalyp ketken dep eseptelýde. Al Acheh provıntsııasynda 47 adam qaıtys bolyp, 51 adam izdestirilip jatyr.

Buǵan deıin Ońtústik-Shyǵys Azııada tolassyz nóser jaýyn jaýǵany habarlanǵan edi. Taılandta tasqyn saldarynan 145 adam qaza taýyp, 3,5 mıllıonnan astam turǵyn zardap shekken. Hatıaı qalasynda sý birtindep qaıtqanymen, kóptegen aýdan áli de sý astynda qalyp, jaryqtan ajyratylǵan. Turǵyndar qıraǵan úılerine oralyp, keltirilgen shyǵyndy eseptep jatyr, keıbiri bar múlkinen aıyrylǵan.

Malaızııada «Senıar» tropıkalyq daýylynyń saldarynan eki adam qaza tapty. Al Vetnamnyń ortalyq provıntsııalarynda uzaqqa sozylǵan nóser men aýqymdy sý tasqyny adam ólimine ákeldi.