Indonezııada zilzala saldarynan 20 myń adam evakýatsııalandy

ASTANA. QazAqparat - Indonezııanyń Lombok aralynda 5 tamyz kúni bolǵan joıqyn jer silkinisi saldarynan 20 myńnan astam adam baspanasyn tastap shyǵýǵa májbúr boldy, dep habarlaıdy «QazAqparat» HAA TASS-qa silteme jasap.

Tabıǵı apattardy toqtatý ulttyq agenttiginiń resmı ókili Sýtopo Nýgrýho 20 myńnan astam jergilikti turǵyn qaýipsiz aımaqqa kóshirilgenin málimdedi. Budan tys, Lombokqa kórshiles jatqan kishigirim araldardaǵy sheteldik týrıster de evakýatsııalanǵan. S. Nýgrýhonyń aıtýynsha, qurbandar sany 98 adamǵa jetken.

«Qaza tapqandardyń barlyǵy - jergilikti turǵyndar. 230-dan astam adam jaraqattanǵan», - deıdi ol. Sheneýnik úıindilerdiń arasynan adamdardy qutqarýǵa aýyr tehnıka jetispeıtindikten, qurbandar sany artýy múmkin ekenin aıtyp dabyl qaǵýda.

Eske sala keteıik, 5 tamyz tamyz kúni Indonezııanyń Lombok aralynda terbelisi 6,6 baldyq zilzala boldy. Alǵashqy málimetter boıynsha apat saldarynan 19 adam qaza tapqan bolatyn.

Birneshe saǵattardan soń qurbandar sany 91-ge jetkeni habarlandy.

Qazaqstan Respýblıkasy Syrtqy ister mınıstrligi Indonezııadaǵy apatqa qatysty málimdeme jasap, qaza tapqandar arasynda Qazaqstan azamattary joq ekenin jetkizdi.