Indonezııada jer silkinisinen keıin júzden astam adam túrmeden qashty
ASTANA. QazAqparat - Indonezııanyń Paýlý qalasynda bolǵan jer silkinisinen keıin túrmeden júzden astam sottalýshy qashyp ketti, dep habarlaıdy QazAqparat Jakarta Post gazetine silteme jasap.
Paýlý qalasynda jerasty dúmpýleri bastalǵan kezde sottalǵandar túrme basshylyǵynan ózderin bostandyqqa jiberýdi suraǵan. Qalaýlary oryndalmaǵannan keıin 340 adam búlik shyǵaryp, túrmege ot qoıǵan. Kolonııaǵa dereý polıtsııa qyzmetkerleri jetken. Biraq jaǵdaıdy tolyǵymen baqylaýǵa alý múmkin bolmaǵan. Sottalǵandardyń birqatary qashyp úlgergen.
Túrmede áli de júzdegen adam bar. Biraq kúzet qyzmeti olardy áreń baqylaýda ustap otyr. Sebebi kolonııa ǵımaraty zilzala men órtten qatty zardap shekken.
Eske salaıyq, juma, 28 qyrkúıek kúni Paýlý qalasyna jaqyn ornalasqan Sýlavesı aralynda 6,1 jáne 7,4 magnıtýdasymen eki jer silkinisi boldy. Qýatty jerasty dúmpýleri bıiktigi eki metrden asqan tsýnamıdiń týyndaýyna ákep soqtyrdy. Sońǵy málimetter boıynsha, 832 adam qaza boldy. Buǵan deıin ajal qushqan 420 adam týraly aıtylǵan edi. El úkimeti bul san áli de artýy múmkindigin joqqa shyǵarmaıdy.
Buǵan deıin habarlaǵanymyzdaı, eki kúnnen beri Sýlavesı aralyn astan-kesteń etken tabıǵı apattan qaza tapqandar arasynda qazaqstandyqtar joq.
Memleket basshysy Nursultan Nazarbaev Indonezııa Prezıdenti Djoko Vıdodoǵa kóńil aıtý jedelhatyn joldady.
