Indonezııada jer silkinip, 91 adam qaza tapty
ASTANA. QazAqparat - Indonezııalyq Lombok aralynda qatty jer silkinisi tirkeldi. Apat saldarynan qaza tapqan adamdar sany 91-ge jetti. Qurbandar sany odan saıyn artýy múmkin, dep habarlaıdy QazAqparat tilshisi TASS agenttigine silteme jasap.
Buǵan deıin Reuters agenttigi 82 adamnyń ólimin jarııalaǵan edi.
Tabıǵı apattardyń aldyn alý boıynsha ulttyq agenttiktiń resmı ókili Sýtopo Nýgroho jer silkinisiniń araldyń soltústik bóligine tıgizgen zalaly asa iri dep baǵalanǵanyn aıtty. Tabıǵı apat saldarynan myńdaǵan úıler kúıregen. Birneshe myń adam qaýipsiz jerlerge jetkizildi. Sondaı-aq, bılik ókilderi tsýnamı qaýpi tónip turǵanyn eskertti.
Jerasty dúmpýi Balı aralynda da sezilgen. Bul jer týrıster arasynda óte tanymal bolyp, alaıda onda eshqandaı apat bolmaǵan.
Indonezııa eliniń prezıdenti Djoko Vıdodo mınıstrler kabınetine, polıtsııaǵa jáne áskerı qyzmetkerlerge qutqarý operatsııasyn jyldamdatýǵa tapsyrma berdi.
Eýropalyq Jerorta teńizi seısmologııalyq ortalyǵynyń málimetinshe, jeksenbi kúni Lombok aralynda 6,6 baldyq jer silkinisi bolǵan. Jerasty dúmpýiniń epıtsentri Mataram qalasynan (319 myń turǵyny bar) soltústik-shyǵysqa qaraı 49 shaqyrym jerde ornalasqan. Zilzala oshaǵy - 10 shaqyrym tereńdikte jatqan.
