Indonezııada janartaý qursaýynda qalǵan 500-den astam týrıst qutqaryldy
ASTANA. QazAqparat - Indonezııanyń Lombok aralynda Rındjanı janartaýynan 500-den astam týrıst qutqaryldy, olardyń kópshiligi sheteldikter. Bul týraly France-Presse (AFP) agenttigi habarlaıdy.
«543 týrıst evakýatsııalandy. Olardyń densaýlyǵyna qaýip tónip turǵan joq», - dep málimdedi jergilikti qutqarý qyzmetiniń ókilderi.
Eske sala keteıik, Indonezııadaǵy jer silkinisinen keıin Rındjanı janartaýy mańyndaǵy taýda 800 týrıst qursaýda qalǵan bolatyn.
Budan buryn habarlanǵandaı, 29 shildede Mataram (319 myń turǵyn) qalasynyń tóńireginde kúshi 6,4 baldyq jer silkinisi bolǵan edi. Zilzalanyń oshaǵy 7,5 shaqyrym tereńdikte ornalasqan.
Kyodo agenttiginiń aqparatyna sáıkes, zardap shekken aýdanda terbelisi 5,7-ge deıin 11 jerasty dúmpýi tirkelgen. Sonyń saldarynan, 14 adam qaza bolyp, 100-den astamy jaraqat aldy.
Aıta keteıik, QR Syrtqy ister mınıstrligi Rındjanı janartaýy mańyndaǵy taýda qorshaýda qalǵan týrısterdiń arasynda Qazaqstan azamattary joq ekenin málimdegen bolatyn.
Foto:epa/vostock-photo
