Indonezııada janartaý atqylaýyna baılanysty halyqaralyq áýe reısteri toqtady

ASTANA. KAZINFORM — Indonezııanyń Shyǵys Kishi Zond araldary provıntsııasyna qarasty Shyǵys Flores aýdanynda ornalasqan Levotobı Lakı-Lakı stratojanartaýy atqylap, kúshti výlkandyq kúl bultyn týdyrdy. Bul jaǵdaı aımaqtaǵy halyqaralyq áýe reısteriniń toqtaýyna sebep boldy, dep jazdy Anadoly agenttigi.

Flores aralyndaǵy Levotobı Lakı-Lakı janartaýy kúldi 10 shaqyrym bıiktikke deıin laqtyrdy.

Angkasa Pura Indonesia memlekettik basqarýshy kompanııasy taratqan málimdemege sáıkes, janartaý belsendiliginiń kúsheıýine baılanysty Balı aralyndaǵy Ngýrah-Raı halyqaralyq áýejaıynda, sondaı-aq aımaqtaǵy birqatar basqa áýejaılarda reıster ushpaı qaldy.

Toqtatylǵan reısterdiń qatarynda Aýstralııalyq Jetstar men Virgin Australia, Úndistandyq Air India, Jańa Zelandııalyq Air New Zealand, Sıngapýrlyq Singapore Airlines jáne Qytaılyq Juneyao Airlines kompanııalarynyń ushaqtary bar.

Indonezııalyq AirAsia áýe kompanııasy da kóptegen ishki reısterin toqtatty.

Levotobı janartaýynyń atqylaýy

Levotobı Lakı-Lakı — Levotobı dep atalatyn qos janartaýdyń bir shyńy. Ol kúldi 10 shaqyrymǵa deıin aspanǵa laqtyrdy. Qalyptasqan sańyraýqulaq tárizdes kúl bulty janartaýdan shamamen 150 shaqyrym qashyqtaǵy eldi mekenderden de kórindi.

Apat aımaǵynda tótenshe jaǵdaı jarııalanyp, jaqyn mańdaǵy aýyldardyń turǵyndary evakýatsııalanyp jatyr. Kúldiń taralýy turǵyndardyń densaýlyǵyna qaýip tóndirip otyr.

Indonezııa Tynyq muhıtyndaǵy «Otty sheńberde», ıaǵnı seısmıkalyq jáne janartaý belsendiligi joǵary aımaqta ornalasqan. El aýmaǵynda 130 belsendi janartaý bar.

Aıta keteıik, 2024 jylǵy qarashada Levotobı Lakı-Lakı janartaýy atqylaǵan kezde 9 adam qaza taýyp, ondaǵan adam jaralanǵan bolatyn.

Eske sala keteıik, buǵan deıin Islandııanyń ońtústik-batys bóligindegi Reıkıanes túbeginde ornalasqan Sýndhnýkýr janartaýy atqylaǵanyn jazǵan edik.