Indonezııada ustalǵan qazaqstandyqtarǵa advokattar izdestirilip jatyr — SІM

ASTANA. KAZINFORM — Syrtqy ister mınıstrliginiń resmı ókili Aıbek Smadııarov Indonezııada esirtki taratý kúdigimen ustalǵan qazaqstandyqtar týraly málimetterdi aıtty. 

— Osyǵan deıin Indonezııada Qazaqstannyń eki azamaty ustaldy degen aqparat tarady. Olar esirtki satty degen kúdikpen quryqtaldy, qazir tergeý amaldary júrip jatyr. Biz olardyń týystarymen baılanystamyz. Árıne, advokat jáne basqa da máselelerge qatysty kómektesip jatyrmyz. Biraq Qazaqstan men Indonezııa arasynda sottalǵandardy berý týraly ekijaqty kelisim joq. Degenmen, dıplomattar olarǵa kómektesý úshin barlyq kúsh-jigerin salyp jatyr, — dedi Aıbek Smadııarov elordada ótken baspasóz máslıhatynda.

Onyń aıtýynsha, atalǵan eldegi jergilikti bılikpen kelissóz júrip jatyr.

— Aldaǵy sotty kútemiz. Sot sheshimi shyqqannan keıin, tıisti is-qımyldar jasalady, — dedi resmı ókil.

Buǵan deıin Indonezııanyń Balı aralynda esirtkige baılanysty qylmys jasady degen kúdikpen ustalǵan eki Qazaqstan azamatyna ólim jazasy taǵaıyndalýy múmkin ekeni aıtyldy. 

Jaqynda Syrtqy ister mınıstriniń orynbasary Álibek Baqaev Senat otyrysynan keıin jýrnalısterge Indonezııanyń Balı aralynda 49 gramm metamfetamınmen ustaldy delingen Qazaqstan azamattary týraly málimet berdi.