Indonezııada ushaq órtenip, ushqysh qaza tapty
ASTANA. KAZINFORM — Indonezııanyń Papýa aımaǵynda belgisiz adamdar ushaqty órtep jiberip, saldarynan amerıkalyq ushqysh qaza tapty, dep habarlaıdy Anadoly.
Ushaq Papýa-Haılends provıntsııasynan shalǵaı ornalasqan ushý-qoný jolaǵynda órtengen. Aldyn ala málimet boıynsha bortta ushqyshtan bólek 7 jolaýshy bolǵan. Ázirge olardyń arasynda zardap shekkenderdiń bar-joǵy habarlanǵan joq.
Indonezııa bıligi oqıǵaǵa qatysty tergeý júrgizip jatyr. Shabýylǵa óńirdegi separatıstik qarýly toptardyń qatysy bar-joǵy resmı túrde rastalmady. Bılik oqıǵanyń naqty sebebi áli anyqtalmaǵanyn málimdedi.
Eldiń kólik mınıstrligi Vamena áýejaıy ákimshiliginiń basshysynan aldyn ala esep alǵanyn habarlap, AQSh azamaty, ushqysh Nıkolas Gosselınniń qaza tapqanyn rastady. Mınıstrlik tergeýshiler men tıisti memlekettik organdar oqıǵanyń mán-jaıyn anyqtap, shabýyldyń qalaı bolǵanyn tekserip jatqanyn málimdedi.
Ushaqpen baılanys beısenbi kúni tańerteń qonǵannan keıin kóp uzamaı úzilgen.
Ushý-qoný jolaǵy ornalasqan ıAhýkımo aýdandyq polıtsııasynyń basshysy Zet Salınonyń aıtýynsha, ushaqty qarýly qylmystyq top músheleri órtep jibergeni týraly aqparat túsken. Onyń sózinshe, bul aımaqqa tek áýe arqyly jetýge bolatyndyqtan, bılik ókilderi jaǵdaıdy birden teksere almaǵan.
Kompas telearnasynyń habarlaýynsha, shabýylǵa, onyń ishinde ushqyshtyń qazasyna jaýapkershilikti Batys Papýanyń Ulttyq azattyq armııasy (TPNPB) óz moınyna alǵan.
Ázirge AQSh tarapy bul oqıǵaǵa qatysty resmı málimdeme jasaǵan joq.
Aıta keteıik, Malıde qarýly toptar eldiń birneshe óńirinde bir mezgilde úılestirilgen shabýyldar uıymdastyrdy.
