Indonezııada ury maımyldarmen kúreske qarýly jasaqtar tartyldy
ASTANA. QazAqparat - Indonezııa bıligi ıAva aralynyń Boıolalı aýdany turǵyndarynyń mazasyn alǵan maımyldarǵa qarsy ózgeshe kúresýdi uıǵardy.
Aralda uzynquıryqty makakalar qarttar men balalarǵa shabýyl jasap, jergilikti kedeı otbasylarynyń azyqtaryn urlap ketýdi órshitti. Indonezııalyqtarǵa kómekke polıtseıler men áskerıler tartyldy, dep habarlaıdy Yahoo.
«Maımyldardyń qurbanyna aınalǵandar kóbinese eski úılerde turatyn jalǵyzbasty kedeıler. Olardyń kórshileri de bolmaǵandyqtan, eshkim kómektese almaıdy», - deıdi jergilikti polıtsııa basshysy Oven Andhı.
Qazirgi ýaqytta aımaqty tártip saqshylary, áskerıler jáne jergilikti sheneýnikterden turatyn qarýly jasaqtar kúzetýde. Sonymen qatar, janýarlarǵa qaýipsiz tuzaqtar qoldanylýda. Tártip saqshylary munymen maımyldardy aýlap, qaıtadan ormanǵa aparyp tastaıdy.
Sońǵy ýaqyttarda maımyldardyń áreketinen 11 adam zardap shekken.
