Indonezııada tolqýlar kúsheıdi: elde jappaı narazylyq aktsııalary ótti

ASTANA. KAZINFORM – Indonezııada depýtattarǵa beriletin jańa turǵyn úı járdemaqysyna qarsy bastalǵan narazylyq eldiń barlyq óńirine taralyp, tártipsizdikter kúsheıdi, dep habarlaıdy Euronews.

25 tamyzda Djakartada bastalǵan sherýler parlament múshelerine 50 mln rýpııa (shamamen 2600 eýro) kóleminde bólinetin járdemaqyǵa baılanysty órshidi. Halyq bul somany eldegi ómir súrý deńgeıimen salystyrǵanda «shamadan tys» dep baǵalap otyr.

Narazylyq aktsııalary barysynda polıtsııa men halyq arasynda qaqtyǵystar boldy. Qaýipsizdik kúshteri sherýshilerge qarsy sý atqyshtar men kóz jasaýratatyn gaz qoldandy.

Kýágerlerdiń aıtýynsha, beıbit turǵyn – 21 jastaǵy kýrer Affan Kýrnıavan tártipsizdikter kezinde polıtsııanyń brondy kóliginen qaza tapqan. Bul oqıǵa halyqtyń ashý-yzasyn odan ári kúsheıtti.

Tártipsizdikter el astanasymen shektelmeı, Sýrabaııa, Solo, Djokıakarta, Medan, Makassar, Manado, Bandýng jáne Papýadaǵy Manokvarı qalalaryna taraldy. Birqatar jerlerde parlament ǵımarattary órtenip, ákimdik ǵımarattaryna shabýyl jasaldy. Bandýngte úsh adam qaza tapty, bes turǵyn túrli jaraqatpen aýrýhanaǵa jetkizildi.

Jaǵdaıǵa baılanysty saýda ortalyqtary men dúkender qaýipsizdik maqsatynda jabyldy. Myńdaǵan mototsıklshi, quqyq qorǵaýshylar men qarapaıym turǵyndar marqum Kýrnıavannyń jerleý rásimine qatysty.

Prezıdent Prabovo Sýbıanto halyqty sabyrǵa shaqyryp, opat bolǵandardyń týystaryna kóńil aıtty.

«Men osy oqıǵaǵa qatty alańdaýlymyn ári qaıǵyly jaǵdaıǵa baılanysty kóńil aıtamyn. Quqyq qorǵaý organdarynyń shamadan tys áreketterine rıza emespin. Barlyq kináliler qatań tergeledi», – dedi memleket basshysy teleúndeýinde.

Resmı málimetke sáıkes, oqıǵaǵa qatysy bar jeti polıtsııa qyzmetkeri qamaýǵa alyndy. Alaıda marqumdy qaqqan kóliktiń júrgizýshisi áli anyqtalǵan joq.

Aıta keteıik, Indonezııadaǵy jer silkinisinen ondaǵan adam zardap shekti.