Indonezııada taýda qalyp qoıǵan 800 týrıstiń arasynda qazaqstandyqtar joq - SІM
ASTANA. QazAqparat - Indonezııadaǵy jer silkinisinen keıin Rındjanı janartaýy mańyndaǵy taýda qorshaýda qalǵan týrısterdiń arasynda Qazaqstan azamattary joq. Bul týraly QR SІM baspasóz qyzmetinen málim boldy, dep habarlaıdy QazAqparat.
«Djakartadaǵy bizdiń konsýlǵa Indonezııa qutqarý qyzmetteri usynǵan aldyn ala aqparatqa sáıkes, qaza bolǵandar nemese Rındjanı taýynda qalǵandar arasynda Qazaqstan azamattary joq», - dep atap ótilgen QR Syrtqy ister mınıstrligi baspasóz qyzmeti habarlamasynda.
TASS agenttiginiń málimetinshe, Indonezııadaǵy jer silkinisinen keıin Rındjanı janartaýy mańyndaǵy taýda 800 týrıst qamalyp qalǵan.
Budan buryn habarlanǵandaı, 29 shildede Mataram (319 myń turǵyn) qalasynyń tóńireginde kúshi 6,4 baldyq jer silkinisi bolǵan edi. Zilzalanyń oshaǵy 7,5 shaqyrym tereńdikte ornalasqan.
Kyodo agenttiginiń aqparatyna sáıkes, zardap shekken aýdanda terbelisi 5,7-ge deıin 11 jerasty dúmpýi tirkelgen. Sonyń saldarynan, 14 adam qaza bolyp, 100-den astamy jaraqat aldy.
Avtor: Damır Baımanov
Foto:Alex Marine Junyatanakorn / Facebook
