Indonezııada sý tasqynynan 47 adam qaza tapty
JAKARTA. QazAqparat – Indonezııa astanasy Jakarta men oǵan jaqyn mańdardyń turǵyndary sý tartylǵanyn kútip, apatty baspanada otyr. Sý tasqyny saldarynan qaza tapqandar sany 47-ge jetti. Bul týraly QazAqparat AP basylymyna silteme jasap habarlaıdy.
Mýssondyq jaýyn men ózenderdiń kóterilýinen Jakarta aýdandary men qala mańynda sel bolyp, kórshiles Lebakta 10 adam qaza tapty.
Indonezııa tabıǵı apattyń saldaryn joıý Ulttyq agenttiginiń baspasóz hatshysy Agýs Vıbovo (Agus Wibowo) mert bolǵandar qatarynda Jańa jyl qarsańynda jaýǵan nóser jańbyrdan keıin sýǵa batyp ketkender men ózender arnasynan asqan kezde elektr togy tıip, opat bolǵandar bar ekenin málimdedi. Úsh adam sýyq tıip qaıtys boldy.
Bul - 2007 jyldan beri bolǵan eń qatty tasqyn, 10 kún ishinde 80 adam qaza tapty.
Vıbovonyń aıtýynsha, tasqyn kezinde 397 myń adam úlken qalalyq aýdandardaǵy mekenderge tyǵylǵan, óıtkeni tasqyn sýdyń bıiktigi keıbir jerlerde 6 metrge (19 fýt) jetken. Agenttiktiń málimeti boıynsha, 173 myńǵa jýyq adam áli úılerine qaıta almaı otyr, eń kóp zardap shekken - Bekası aýdanynyń turǵyndary.
152 myń adam burynǵysha Jakartanyń Bekası qalasyndaǵy 98 apatty mekende otyr. Agenttik qalanyń kóp bóliginde sý áli 2 metrge jetetinin aıtty.
Úkimet sýdyń tartylǵanyn paıdalanyp kóshelerdi balshyq pen qoqystan tazartyp jatyr. On myńdaǵan úı men mekemelerde elektr jelisi qalpyna keltirildi.
Meterologııa, klımatologııa jáne geofızıka agenttiginiń basshysy Dvıkorıta Karnavatı (Dwikorita Karnawati ) jaqyn kúnderi el astanasynda taǵy da nóser jaýyp, Indonezııadaǵy jaýyn-shashyn kelesi aıǵa deıin saqtalýy múmkin ekenin aıtty.
Úkimet juma kúni Jakartadan jaýyn bulttaryn shyǵarýǵa kiristi. Bılik sáýirde aıaqtalatyn jaýyn-shashyn maýsymynda budan da úlken sý tasqyny bolýy múmkin ekenin eskertedi.
Sý tasqyny Indonezııanyń ınfraqurylym máselesin aldyńǵy orynǵa qoıdy.
Memleket astanasynda 10 mıllıon adam ómir súredi, qala syrtyndaǵy turǵyndardy qosqanda 30 mln adam. Djakarta jer asty sýlaryn durys paıdalanbaǵandyqtan álemniń eń jyldam batatany qalalarynyń biri sanalady, astanada jer silkinisi men sý tasqyny jıi bolyp turady. Baǵalaý boıynsha halyq tyǵyzdyǵy el ekonomıkasyna jylyna 6,5 mlrd dollar shyǵyn keltiredi.
Prezıdent Djoko Vıdodo tamyz aıynda el astanasy halyq sırek qonystanǵan, tropıkalyq ormandary jáne orangýtandarymen tanymal Borneo aralyndaǵy Shyǵys Kalımantan provıntsııasyna aýysatynyn málimdedi.
