Indonezııada sý tasqyny saldarynan 70-ten astam adam qaıtys boldy
DJAKARTA. QazAqparat – Indonezııa bıligi jeksenbide Shyǵys Indonezııa men kórshiles jatqan Shyǵys Tımorda sý tasqyny men kóshkin saldarynan 70-ten astam adam qaıtys boldy dep málimdedi jáne qurban bolǵandardyń sany artýy múmkin ekenin eskertti. 42 adam áli habarsyz ketken dep sanalady, dep habarlaıdy QazAqparat The Guardian basylymyna silteme jasap.
Nóser jańbyr Indonezııadaǵy Flores aralynan Indonezııa arhıpelagynyń shyǵysyndaǵy shaǵyn memleket - Shyǵys Tımorǵa deıingi araldarda úılerdi qıratyp, zobalań týdyrdy. Shyǵys Tımor astanasy Dılıdegi sý tasqynynan 11 adam qaıtys boldy dep habarlanady. Bılik qaza tapqandar men jaralanǵandardyń sany áli de artýy múmkin dep eskertti.
Shyǵys Flores okrýginde 60 adam qaıtys boldy, olardyń kópshiligi Lemanele aýylynan. Bul derekter áli resmı rastalǵan joq. Zardap shekkender kórshi aýyldarǵa evakýatsııalandy.
Jeksenbide kórshiles Batys Nýsa-Tengara provıntsııasyndaǵy Bıma qalasynda taǵy eki adam sý tasqynynan qaıtys boldy, dep habarlaıdy tótenshe jaǵdaı agenttigi.
Tórt aýdandaǵy bógetter de isten shyǵyp, Bımadaǵy 10 000 úıdi 9 saǵat qatarynan jaýǵan nóser saldarynan sý basty. Maýsymdyq jańbyr kóbinese Indonezııa arhıpelagynda sý tasqyny men jer kóshkinin týdyrady. Qańtarda Indonezııanyń Batys ıAva qalasyndaǵy Sýmedang qalasynda sý tasqyny bolyp, 40 adam qaza tapqan edi. Ótken jyldyń qyrkúıeginde Borneodaǵy kóshkin saldarynan 11 adam qaıtys boldy. Eldiń Tótenshe jaǵdaılar agenttigi 125 mıllıon ındonezııalyq (el halqynyń jartysyna jýyǵy) kóshkin qaýpi bar jerlerde turady dep esepteıdi.
Ekologtardyń pikirinshe, tabıǵı apattar kóbinese ormandy otaý saldarynan bolady. Eske salaıyq, aqpan aıynda Indonezııa astanasynyń 1300-den astam turǵyny nóser jańbyrdyń saldarynan bolǵan sý tasqyny úshin úılerin tastap ketýge májbúr boldy.
Birneshe ózen bir mezette arnasynan shyqty.
