Indonezııada sý tasqynynan 16 adam qaza taýyp, 140-tan astam úıdi sý shaıyp ketti
ASTANA.KAZINFORM — Nóser jańbyr saldarynan bolǵan sý tasqyny men kóshkin saldarynan Indonezııanyń Soltústik Sýlavesı provıntsııasynda keminde 16 adam qaza taýyp, 140-tan astam úıdi sý shaıyp ketti, dep habarlaıdy Euronews.
Jeltoqsan aıynda bolǵan sý tasqyndarynan keıin el boıynsha 148 adam áli kúnge deıin habar-osharsyz ketkender qatarynda.
Resmı tulǵalardyń seısenbi kúni habarlaýynsha, birneshe kúnge sozylǵan mýsson jańbyry dúısenbi kúni ózen jaǵalaýyn shaıyp, laı, tas jáne qoqyspen aralasqan tasqyn sý aýyldardy basyp qalǵan.
Ulttyq tótenshe jaǵdaılardy basqarý agenttiginiń málimetinshe, qutqarýshylar polıtsııa men áskerılerdiń qoldaýymen Sýlavesıdiń soltústik shetinen 130 shaqyrym jerde ornalasqan shaǵyn Sıaý aralyndaǵy tórt qıraǵan aýylǵa attanǵan. Sıaý araly Indonezııadaǵy kólemi jaǵynan tórtinshi úlken aral – Sýlavesıdiń mańynda ornalasqan.
Keıbir eldi mekenderge joldardyń buzylýy men baılanys júıesiniń isten shyǵýyna baılanysty jetý qıynǵa soqqan.
Mýharıdiń aıtýynsha, sý tasqyny saldarynan 680-nen astam turǵyn ýaqytsha baspana retinde shirkeý men qoǵamdyq ǵımarattarǵa ornalastyrylǵan.
Soltústik Sýlavesı izdestirý-qutqarý basqarmasynyń ókilderi seısenbi kúni aýa raıy jaqsaryp, sý deńgeıi tómendegennen keıin 16 adamnyń máıiti tabylǵanyn málimdedi. Qutqarý jumystary tutas aýdandardy sý basqan óńirlerde joǵalǵan úsh adamdy izdeýmen jalǵasyp jatyr.
Aımaq bıligi dúısenbiden bastap 14 kúndik tótenshe áreket etý rejımin jarııalady. Bul sheshim apattan 25 adam zardap shekkennen keıin gýmanıtarlyq kómekti jedel jetkizýge, evakýatsııany jáne ınfraqurylymdy qalpyna keltirýdi jedeldetýge baǵyttalǵan.
Bul qaıǵyly oqıǵa jeltoqsan aıynda Indonezııanyń eń iri araly – Sýmatradaǵy 52 qala men aýdandy qamtyǵan sý tasqyndarynan keıin tirkelip otyr. Ol kezde 1 178 adam qaza taýyp, 7 myńnan astam adam jaraqat alǵan.
Ulttyq apat saldaryn joıý agenttiginiń deregine sáıkes, seısenbi kúngi jaǵdaı boıynsha jeltoqsan aıyndaǵy sý tasqyndarynan keıin 148 adam áli de habar-osharsyz ketken dep esepteledi.
Eske salsaq Indonezııada tabıǵı apat saldarynan qaza tapqandar sany 900-den asqan edi.