Indonezııada iri janartaý atqylaýynan keıin dabyldyń eń joǵary deńgeıi jarııalandy
ASTANA.KAZINFORM - Indonezııada Semerý janartaýy atqylady, nátıjesinde eki shaqyrym bıiktikke kóterilgen kúl tanymal týrıstik ıAva aralyn basyp qaldy. Bılik qaýiptiliktiń eń joǵary deńgeıin jarııalady, dep habarlaıdy Bild.
Výlkanologııa agenttiginiń málimeti boıynsha, atqylaý 19 qarasha kúni tústen keıin bastaldy. Ystyq kúl Semerý betkeıin basyp, júzdegen adamdy evakýatsııalaýǵa jáne ýaqytsha baspanalarǵa ornalastyrýǵa májbúr etti.
Indonezııada jer silkinisi men janartaý atqylaýy jıi kezdesedi. Bıiktigi 3 676 metr bolatyn Semerý eldegi shamamen 130 belsendi janartaýdyń biri jáne ıAva aralyndaǵy eń bıik taý. Onyń eń sońǵy qýatty atqylaýy 2022 jyldyń sońynda boldy.
Biz buǵan deıin Indonezııada Levotobı Lakı-Lakı janartaýy qaıta atqylaı bastaǵanyn jazǵan edik.
Sondaı-aq, Gavaııdegi Kılaýea janartaýy qaıta oıandy.