Indonezııada Merapı janartaýy atqylaýynan qaza bolǵandar sany 156 adamǵa jetti
ASTANA. 8 qarasha. QazAqparat - Indonezııada Merapı janartaýy atqylaýynan qaza bolǵandar sany 156 adamǵa jetti. 7 qarashada janartaý atqylaýy jalǵasyp, aýaǵa tastar men gaz tasqyny kóterildi, tómen qaraı lava quıyldy,
dep habarlaıdy RBK United Press International agenttigine silteme jasap.
Janartaý atqylaýynyń kúshtiligi sonsha, 6 qarashada álemdik keıbir áýe kompanııalary Indonezııanyń astanasy Djakartaǵa ushý saparlaryn keıinge qaldyrýǵa sheshim qabyldap jatty. Apat aımaǵynan el úkimeti 200 myńǵa tarta adamdy qaýipsiz aımaqtarǵa kóshirdi.
Merapı ıAva aralynda ornalasqan. Indonezııadaǵy eń belsendi janartaý bolyp tabylady. Osyndaı tiri atqylaýlar onda shamamen jeti jylda bir qaıtalanyp turady.
