Indonezııada memleket basshysynyń áńgimesin zańsyz tyńdaǵan shendiler qolǵa tústi
ASTANA. KAZINFORM — Indonezııa prezıdenti Prabovo Sýbıanto óz ákimshiliginiń basshysy Lıstıo Sıgıt Prabovony qyzmetinen bosatty. Ol memleket basshysy men mınıstrlerdi qosa alǵanda, joǵary laýazymdy birneshe sheneýniktiń telefon arqyly áńgimeleskenin zańsyz tyńdady degen kúdikpen ustalǵan, dep habarlaıdy Kazinform agenttigi Al Jazeera basylymyna silteme jasap.
Aıta keteıik, Lıstıo Sıgıt Prabovo Indonezııa prezıdenti ákimshiliginiń basshysy qyzmetine ótken aıda ǵana taǵaıyndalǵan edi.
Jergilikti BAQ-tyń habarlaýynsha, Lıstıo Ulttyq polıtsııany basqarǵan ótken jyldan bıylǵa deıingi aralyqta birqatar joǵary laýazymdy tulǵanyń telefon arqyly sóılesken áńgimeleri zańsyz tyńdalǵan.
Osy iske baılanysty odan bólek polıtsııanyń taǵy eki joǵary laýazymdy qyzmetkeri ustaldy.
— Bul áreketke jekelegen teris pıǵyldy adamdar barǵan. Mundaı qadamdy memleketke opasyzdyq jasaýǵa jaqyn áreket dep baǵalaýǵa bolady. Óıtkeni ol eldiń ulttyq múddesi men qaýipsizdigine, onyń ishinde memleket basshysynyń ómiri men qaýipsizdigine qater tóndiredi, — dedi Indonezııa prezıdentiniń baspasóz hatshysy.
Kúdiktiler ótken aıda tyńdalǵan habarlamalar jazylǵan faıldardy joıýǵa buıryq berip, qylmys izin jasyrmaq boldy dep te aıyptalyp otyr.
Bul árekettiń qandaı maqsatta júrgizilgeni ázirge belgisiz.
Sársenbi kúni Indonezııa áskeri el astanasy Djakartaǵa 20 myńnan astam áskerı qyzmetshini jiberdi. Alaıda bul sheshimniń kúdiktilerdi ustaý oqıǵasyna qatysy bar-joǵy jóninde resmı málimdeme jasalǵan joq.
Indonezııa Qarýly kúshteriniń ókili áskerı qyzmetshilerdi ornalastyrý eldiń ulttyq qaýipsizdigi men aýmaqtyq tutastyǵyn qamtamasyz etýge baǵyttalǵan qalypty shara ekenin málimdedi.
Buǵan deıin Ázerbaıjannyń burynǵy sheneýnigine elge opasyzdyq jasady degen aýyr aıyp taǵylǵany habarlanǵan bolatyn.
