Indonezııada Malaysia Airlines ushqyshy iri kólemdegi esirtkimen qolǵa tústi
ASTANA. KAZINFORM – Malaysia Airlines áýe kompanııasynyń ushqyshy Indonezııa astanasy Djakartada shamamen 70 myń ekstazı tabletkasymen ustaldy, dep habarlaıdy Bild.
39 jastaǵy ushqysh Djakartadaǵy Sýkarno-Hatta halyqaralyq áýejaıynda qolǵa túsken. Keden qyzmetkerleri onyń júginen 70 114 ekstazı tabletkasyn jáne az mólsherde metamfetamın tapqan.
Kúdikti ustalar aldynda Malaysia Airlines kompanııasynyń Kýala-Lýmpýr – Djakarta baǵytyndaǵy MH727 reısin oryndaǵan. Ushaq qonǵannan keıin júrgizilgen esirtkige arnalǵan test onyń aǵzasynan ekstazı, metamfetamın jáne kokaın izderin anyqtaǵan.
Tergeý barysynda ushqyshtyń janynan zár quıylǵan shaǵyn bótelke tabylǵan. Bılik ókilderiniń boljamynsha, ol esirtkige arnalǵan taldaý nátıjesin jasyryn burmalaý úshin daıyndalǵan bolýy múmkin.
Tergeý málimetinshe, ushqysh esirtkini tasymaldaǵany úshin 50 myń malaızııalyq rınggıt (shamamen 10 myń eýro) alǵan. Tárkilengen esirtki partııasynyń quny 13,5 mln malaızııalyq rınggıtke (shamamen 2,86 mln eýro) baǵalanyp otyr.
«Malaysia Airlines ushqyshqa taǵylǵan aıyptardy óte baıyppen qabyldaıdy jáne tergeý organdarymen tolyq yntymaqtastyq ornatyp otyr», – dep málimdedi áýe kompanııasy.
Eger ushqyshtyń kinási dáleldense, oǵan Indonezııa zańnamasyna sáıkes ómir boıyna bas bostandyǵynan aıyrý nemese ólim jazasy taǵaıyndalýy múmkin. Alaıda elde 2016 jyldan beri ólim jazasy is júzinde oryndalmaǵan.
Ushqyshtyń ustalýy Malaysia Airlines kompanııasyn taǵy da álemdik nazarǵa shyǵardy. Áýe kompanııasynyń ataýy osydan 12 jyldan astam ýaqyt buryn iz-túzsiz joǵalǵan MH370 reısimen de baılanysty.
Aıta keteıik, Shrı-Lankada 112 kg esirtki tasymaldaǵan 22 monah ustalǵan bolatyn.
