Indonezııada magnıtýdasy 5,6-ǵa jetken jer silkinisi tirkeldi
ASTANA. KAZINFORM – Indonezııanyń Soltústik Malýký provıntsııasyndaǵy Tobelo qalasynyń mańynda magnıtýdasy 5,6 jer silkinisi tirkeldi, dep habarlaıdy AQSh Geologııalyq qyzmetine (USGS).
Zilzalanyń jergilikti ýaqyt boıynsha tańǵy 05:00 shamasynda bolǵany habarlandy. Jer silkinisiniń oshaǵy 162,2 shaqyrym tereńdikte ornalasqan.
Jerasty dúmpýleriniń epıtsentri 2,422° soltústik endik jáne 128,170° shyǵys boılyqta, Tobelo qalasynan soltústik-soltústik-shyǵysqa qaraı shamamen 78 shaqyrym jerde ornalasqan.
Qazirgi ýaqytta zardap shekkender men qıraǵan nysandar týraly aqparat joq.
Buǵan deıin Tımor-Lesteniń Lospalos qalasynan 83 shaqyrym shyǵysqa qaraı magnıtýdasy 5,3 jer silkinisi bolǵany habarlanǵan.
Sondaı-aq 12 qyrkúıek kúni Indonezııa jaǵalaýynda magnıtýdasy 6,6 bolatyn kúshti jer silkinisi tirkeldi.
