Indonezııada Levotobı Lakı-Lakı janartaýy taǵy da atqylady
ASTANA. KAZINFORM – Indonezııanyń Shyǵys Nýsa-Tenggara provıntsııasynda ornalasqan Levotobı Lakı-Lakı janartaýy taǵy da atqylady. Indonezııanyń Výlkanologııa jáne geologııalyq qaýip-qaterlerdi azaıtý ortalyǵynyń málimetinshe, janartaý atqylaýy 18 maýsymnan beri jalǵasyp keledi, dep jazady Anadolu.
Kezekti atqylaý búgin jergilikti ýaqytpen 01:05-te bolǵan. Atqylaý nátıjesinde kúl baǵany 18 shaqyrym bıiktikke deıin kóterilgen. Qyzǵan gazdan paıda bolǵan bulttar janartaý baýraıymen tómen qaraı jyljysa, kúl jaqyn mańdaǵy aýyldarǵa taralǵan.
Qaza tapqandar men zardap shekkender týraly aqparat joq.
18 maýsymda bolǵan alǵashqy atqylaýdan keıin qaýip deńgeıi eń joǵarǵy deńgeıge kóterilip, janartaýdyń aınalasyndaǵy tyıym salynǵan aımaq 7 shaqyrymǵa deıin keńeıtilgen.
Bıiktigi 1584 metr bolatyn Levotobı Lakı-Lakı taýy kórshiles ornalasqan Levotobı Perempýan janartaýymen «egiz» dep sanalady.
Indonezııa Tynyq muhıtyndaǵy «ot saqınasy» aımaǵyna kiredi jáne el aýmaǵynda shamamen 130 belsendi janartaý bar.
2024 jyldyń qarasha aıynda Levotobı Lakı-Lakı janartaýynyń atqylaýynan 9 adam qaza taýyp, ondaǵan turǵyn jaraqat alǵan.