Indonezııada kóshkinnen 15 adam qaza taýyp, ondaǵan adam iz-túzsiz joǵaldy
DJAKARTA. QazAqparat - Indonezııanyń shalǵaı araldarynyń birinde bolǵan nóser jaýyn men kóshkin saldarynan 15 adam qaza taýyp, ondaǵan adam iz-túzsiz joǵalyp ketti, dep habarlaıdy QazAqparat AFP-ǵa silteme jasap.
Eldiń Rıaý provıntsııasynyń Natýna aýdanynda bolǵan kóshkinnen zardap shekken aýyldy tabýǵa aýa raıynyń qolaısyzdyǵy men baılanys jelileriniń zaqymdanýy kedergi keltirip otyr, dep habarlady Indonezııanyń Tabıǵı apattardy basqarý ulttyq agenttiginiń (BNPB) sheneýnikteri.
Shalǵaıdaǵy Serasan aralyndaǵy jartastyń janyndaǵy úılerdi laı men qoqys basty. 50 adam iz-túzsiz joǵalyp, 15 adam qaza tapty.
BNPB ókili Abdýl Mýharı dúısenbi kúni keshke jasaǵan málimdemesinde Natýna aralyndaǵy Penagı portynan zardap shekken aımaqqa 60 adamnan turatyn izdeý-qutqarý toby ushyp kelgenin aıtty.
Qazir aralǵa jetý qıyn. Oǵan barar jol ádette jyldam qaıyqpen shamamen bes saǵatty alady.
«Erteń apattardy joıý jónindegi ulttyq agenttik protsesti jedeldetý úshin tikushaq jiberedi», - dedi ol jergilikti Kompas TV arnasyna.
Kóshkin saldarynan aýyldaǵy joldar jabylǵandyqtan evakýatsııalaý protsesi qıynǵa soqty.
Indonezııa jańbyrly maýsymda kóshkinge beıim. Tolassyz jaýǵan jańbyr arhıpelagtyń ártúrli bólikterinde sý tasqynyn týdyrady. Sarapshylar klımattyń ózgerýiniń saldary eldegi ekstremaldy klımat pen aýa raıy qubylystarymen baılanysty apattardy kúsheıtýi múmkin deıdi.
Indonezııanyń Borneo bóligindegi sý tasqyny saldarynan 17 myńnan astam úıdi sý basty. Malaızııada da tolassyz jaýǵan jańbyr sý tasqynyna ákep soqty. Sońǵy aptada eldiń birneshe shtatynda 4 adam qaza taýyp, 41 myńǵa jýyq adam evakýatsııalandy.
2020 jyly Indonezııa astanasy Djakarta sońǵy jyldardaǵy eń joıqyn sý tasqynynyń birin bastan keshirip, saldarynan 67 adam kóz jumǵan.
