Indonezııada qarttar úıindegi órtten 16 adam qaza tapty

ASTANA. KAZINFORM — Indonezııa polıtsııasy Soltústik Sýlavesı provıntsııasynyń ákimshilik ortalyǵy — Manado qalasyndaǵy qarttar úıinde bolǵan órt saldarynan qaza tapqan 16 adamnyń jeke basyn anyqtaý jumystaryn júrgizip jatyr. Bul týraly dúısenbi kúni aımaqtyq polıtsııanyń qoǵammen baılanys bóliminiń basshysy Alamsıa Hasıbýan habarlady, dep Sınhýa agenttigi jazdy.

Onyń aıtýynsha, marqumdardy sáıkestendirý rásimi polıtsııa gospıtalinde ótip jatyr. Bul protsess qurbandardyń jeke basyn tolyq anyqtap, keıin olardyń otbasylarymen tıisti úılestirý jumystaryn júrgizý úshin qajet ekenin atap ótti.

Hasıbýannyń málimetinshe, órt jeksenbi kúni jergilikti ýaqytpen saǵat 20:36-da bastalyp, Manado qalasynyń ákimshiligi jibergen úsh órt sóndirý kóligi kelgennen keıin shamamen 21:30-da tolyqtaı sóndirilgen.

Órt týraly habar túsken boıda polıtsııa qyzmetkerleri aımaqtyń qaýipsizdigin qamtamasyz etý jáne qutqarý jumystaryna kómektesý úshin jedel sharalar qabyldady. Aman qalǵan adamdar jergilikti aýrýhanalarǵa jetkizildi.

Polıtsııa oqıǵanyń mán-jaıyn anyqtaý úshin tergeý jumystaryn bastap, oqıǵa ornyn tekserip, kýágerlerden jaýap alyp jatyr. Alamsıa Hasıbýannyń aıtýynsha, tergeýdiń maqsaty — órttiń qalaı shyqqanyn jáne onyń aldyn ala sebebin anyqtaý.  

Buǵan deıin Indonezııadaǵy sý tasqynynan mert bolǵandar sany 500-den asqanyn jazǵan edik.