Indonezııada «Islamıadanyń» shymyldyǵy ashyldy
ASTANA. 23 qyrkúıek. QazAqparat - Keshe Indonezııada Islam elderiniń búkilálemdik úshinshi sport oıyndary bastaldy. Bul týraly muslim.kz habarlady.
Uıymdastyrýshylardyń aıtýynsha, 46 musylman elinen 1800 sportshy tórtkúl dúnıe kóz tikken dúbirli dodaǵa qatysyp, baqtaryn synaıdy. Sonyń ishinde saıası turaqsyzdyq jaılap, tolqýdan kóz ashpaı otyrǵan Mysyr, Irak jáne azamattyq soǵys sharpyǵan Sırııa elderiniń ókilderi de dúbirli dodadan syrt qalmady.
Alaıda, Sýmatra aralyndaǵy Palembang qalasynda bolyp ótken aıtýly sharanyń ashylý saltanaty qarajattyń jetkiliksizdiginen, bólingen qarjynyń dittegen jerine der kezinde jetkizilmegendiginen tym jupynylyǵymen erekshelendi. Munyń sebebi, Iran Islamıadany ótkizýden aıaq astynan bas tartqandyqtan, Indonezııanyń tyńǵylyqty daıyndalýǵa murshasy bolmady.
Islamıada alǵash ret Saýd Arabııasynda ótkenin aıta ketý kerek. Sharıǵat talaptary qatań saqtalatyn osynaý elde erler men áıelderdiń jarysy bólek ótkizilip, áıelderge qysqa kıim kııýge ruqsat berilgen joq. Buǵan qosa, erler jaǵy áıelderdiń sýda júzý jarysyn tamashalaı almady.
Indonezııa bul shekteýler men tyıymdardy alyp tastady. Sporttyń 11 túri boıynsha ótetin jarys qazan aıynyń 1-ne deıin sozylady.
