Indonezııada esirtkimen ustalǵan qazaqstandyqtar elge qaıtarylýy múmkin be

ASTANA. KAZINFORM — Syrtqy ister mınıstriniń orynbasary Álibek Baqaev Senat otyrysynan keıin jýrnalısterge Indonezııanyń Balı aralynda 49 gramm metamfetamınmen ustaldy delingen Qazaqstan azamattary týraly málimet berdi.

— Bul aqparat resmı túrde rastaldy. Indonezııa taraby bizge bul aqparatty elshilikke joldady. Qazaqstannyń 2 azamaty Indonezııanyń zańyn buzyp, ustaldy. Indonezııa taraby qazir tıisti tergeý jumystaryn júrgizip jatyr. Qazaqstan men Indonezııa arasynda ustalǵan azamattardy almaý týraly qujattar ázirshe joq. Biraq 2014 jyldan beri bul máseleni Indonezııa tarabymen kóterip jatyrmyz. Búginge deıin ondaı oqıǵa bolmaǵandyqtan, Indonezııa tarabynyń ondaı qujattardyń qajeti joq degen ustanymy bolǵan. Búgingi tańda qajettiligi bar. Degenmen, ondaı qujattar bolmasa da, zańdy túrde Indonezııa tarabyna resmı saýal jasaýǵa múddelimiz. Sol saýalǵa Indonezııa taraby jaýap berse, sonyń negizinde ekijaqty qarym-qatynas jalǵasady, — dedi ol jýrnalıst suraǵyna bergen jaýabynda.

Álibek Baqaev dıplomattar Indonezııa soty qazaqstandyqtardyń áreketi boıynsha qandaı sheshim shyǵaratynyn kútetinin aıtty. 

— Búgingi tańda ol eki otandasymyz týraly resmı aqparat bar. Indonezııa taraby qandaı sheshim qabyldaıtynyn kútemiz. Sot sheshimi shyqqannan keıin, sonyń nátıjesi boıynsha jumys júrgizemiz, — dedi mınıstr orynbasary.

Dıplomattyń aıtýynsha, atalǵan Qazaqstan azamattary Indonezııadaǵy Qazaqstan konsýldyǵyna júginbegen. Biraq dıplomatııalyq kanalmen aqparat kelip túsken boıda konsýldyq zań aıasynda tergeý tarabymen baılanysqa shyqqan.

— Bul másele azamattardyń ózderine baılanysty. Olar syrtta ustalsa, ózderi konsýldy shaqyrýǵa haqyly bolǵan. Konsýl kerek degen habar berse, mindetti túrde Indonezııadaǵy konsýlymyz baryp, sol azamattarmen sóılesedi. Búgingi tańda baılanys bolmady. Konsýldyq ókilderi ony kútpesten tergeý tarabymen baılanysqa shyqty. Biraq qorǵaýshyny Indonezııa taraby berdi. Bul jerde Qazaqstan azamattary ǵana emes, kúdikke ilingen basqa elderdiń azamattary da bar, — dedi dıplomat.

Buǵan deıin atalǵan qazaqstandyqtar Indonezııa zańnamasy boıynsha ólim jazasyna kesilýi múmkin ekenin jazǵan edik.