Indonezııada el astanasy basqa qalaǵa kóshirilýi múmkin
NUR-SULTAN. QazAqparat - Indonezııanyń josparlaý mınıstrligi astanany Jakartadan basqa qalaǵa aýystyrý týraly sheshim qabyldady. Bul týraly VVS basylymy jazdy.
«Indonezııa prezıdenti memleket astanasyn aýystyrý týraly mańyzdy sheshim qabyldady. Jańa astananyń orny áli belgisiz. Degenmen, Borneo aralyndaǵy Palangkaraıa jeri tańdalýy múmkin degen boljam bar. Al on mıllıonnan astam turǵyny bar Jakarta qalasy óte jyldam damyp jatyr», - dep jazady basylym.
Keltirilgen derekterge qaraǵanda, Indonezııa prezıdenti Vıdodo saılaýdaǵy jeńisi týraly habarlaǵan kezde astanany aýystyratynyn aıtqan edi. Degenmen, saılaýdyń resmı nátıjeleri tek 22 mamyrǵa qaraı habarlanýy tıis.
Indonezııanyń bas qalasyn kóshirý týraly ıdeıa memleket táýelsizdigin alǵan 1945 jyldan beri birneshe ret aıtylǵan bolatyn. Al 2016 jyly álemdegi eń úlken kólik keptelisi Jakartada bolatyny anyqtalǵan. Sonymen qatar Jakarta álem boıynsha sý astyna eń jyldam ketip bara jatqan qala sanalady. Ǵalymdardyń aıtýynsha, 2050 jylǵa qaraı megapolıstiń teń jartysyn sý basýy múmkin.
