Indonezııada tsýnamıden 20 adam mert bolyp, 165-i zardap shekti
ASTANA. QazAqparat - Senbi kúni keshkisin Indonezııanyń batys bóligindegi Zond buǵazy jaǵalaýynda tsýnamı bolyp, saldarynan kem degende 165 adam zardap shegip, 20-sy qaza tapty. Taǵy eki adam iz-túzsiz joǵalǵan. Sondaı-aq, kóptegen úıler men ǵımarattar qıraǵan. Bul týraly Sınhýa agenttigi eldiń Tabıǵı apattardyń aldyn alý agenttiginiń ókili Sýtopo Pýrvo Nýgrohoǵa silteme jasap habarlady.
Onyń aıtýynsha, tsýnamı Djakarta ýaqytymen 21:27-de bolǵan, saldarynan Zond buǵazy jaǵalaýyndaǵy aýdandar, sonyń ishinde Banten provıntsııasy Pandeglang jáne Serang okrýgteri jáne Lampýng provıntsııasy Ońtústik Lampýng okrýgi zardap shekken.
«Tabıǵı apat qaýpi men qurbandar sany artýy múmkin. Sebebi kóptegen zardap shekken aýdandarda ázirge baǵalaý júrgizilmedi», - dedi ol.
Jergilikti tabıǵı apat zalalyn joıý qyzmetiniń aqparaty boıynsha, qaza tapqandardyń basym bóligi - demalys kúnderin osy aýdandarda ótkizýge kelgen ındonezııalyq týrıster.
Foto: BNPB / HANDOUT, EPA-EFE
