Indonezııada bortynda 280 adamy bar parom órtenip ketti

ASTANA. KAZINFORM – Indonezııanyń Soltústik Sýlavesı provıntsııasynda bortynda 280-ge jýyq adam bolǵan jolaýshylar paromy órtendi, dep habarlaıdy Kazinform Jakarta Globe basylymyna silteme jasap.

Soltústik Sýlavesı izdeý-qutqarý agenttiginiń (SAR) málimetinshe, Barselona paromyndaǵy órt Manadodan 60 shaqyrym jerde bolǵan. Dúrbeleńge túsken adamdar qutqarý úshin sýǵa sekirgen. 

Sınhýa agenttiginiń habarlaýynsha, atalmysh oqıǵa kezinde 3 adam qaza tapqan. 150-ge jýyq adam qutqaryldy. Jolaýshylardyń tolyq tizimi áli jarııalanǵan joq. 

Negizinen Barselona paromy provıntsııanyń eń kóp júk tasymaldaý baǵyttarynyń birine qyzmet kórsetedi. 

Aıta keteıik, Manado portynda aman qalǵandarǵa kómek kórsetý maqsatynda ýaqytsha baspana salyndy. 

Buǵan deıin AQSh-ta áýege kóterilgen ushaqtyń qozǵalqyshynan órt shyqqanyn jazǵan edik.