Indonezııada batyp ketken kemeniń 69 jolaýshysyn izdeý jalǵasyp jatyr
ASTANA. KAZINFORM — Qyrkúıektiń basynda Indonezııaǵa tıesili kemeniń batyp ketýinen mert bolǵandar sany 66-ǵa jetti, dep habarlaıdy Kazinform Reuters agenttigine silteme jasap.
Qutqarýshylardyń kemede bolǵandardy izdep jatqanyna 16 kún boldy. 69 jolaýshydan áli kúnge habar-oshar bolmaı otyr.
Teńiz túbine ketken, sý syıymy 4277 tonnalyq kemeni súńgýirler muqııat zerttep júr. Іzdeý jumystaryna kemeniń qıraǵan bólikteri, shashyrap jatqan úshkir zattar kedergi jasap jatyr ári kemeniń aýdarylyp ketý qaýpi de bar. Budan tys, jınalyp qalǵan gazdar jáne kemeniń otyny da jumysty qıyndatyp otyr.
Eske sala keteıik, Indonezııada shamamen 240 adam mingen jolaýshylar kemesi ıAva teńizinde baılanysqa shyqpaı qaldy.
Keıin keme tabyldy. Jergilikti BAQ-tyń habarlaýynsha, 110-ǵa jýyq adam qutqaryldy. Sol kezde bir jolaýshynyń qaza tapqany rastalǵan edi.
