Indonezııa jańa elordasyna Astanany úlgi retinde alyp otyr – Jeńis Qasymbek
Astana ákimi Jeńis Qasymbektiń aıtýynsha, Indonezııanyń jańa astanasy Nýsantara qalasy Astanaǵa qarap boı túzep keledi. Jibek Joly telearnasyna suhbat bergen shahar basshysy osyndaı málimet aıtty, dep habarlaıdy Kazinform.
«Ár qalanyń ereksheligi bar. Astananyń da óz artyqshylyqtary az emes. Mysaly, bireýmen salystyrý men úshin qıyn. Bir áriptesim Sıngapýrda bolǵan konferentsııadan maǵan vıdeo jibergen. Sol jerde Indonezııanyń jańa astanasynyń ókilderi (Nýsantara qalasy — red.) baıandama jasap, „Astanany mysal retinde aldyq, Astana — bizge úlgi“ dep aıtyp otyr. Jazda osynda kelip, eki ret kezdesken. Sondyqtan „myna qala durys, mynaý durys emes“ dep aıtý qıyn. Astananyń óz joly bar, ereksheligi bar. Kóp másele sheshiledi, bolashaqta Astana basqa qalalarǵa úlken úlgi bolady dep oılaımyn», — dedi ákim.
Jeńis Qasymbek elorda ákimi retinde Shymkent pen Almatydaǵy sátti jobalardy baqylap otyratynyn aıtyp qaldy.
«Bizde ondaı báseke joq. Biraq basqa óńirlerde, onyń ishinde Almatyda da ne bolyp jatqanyn jaqsy bilemiz. Mysaly bir joba nátıjeli bolsa, Astanada jasaýǵa bola ma dep qaraımyz. Shymkentte bylaı jasap jatyr, biz nege jasamaımyz dep saraptap otyramyz. Astanada qurylys tolyq toqtamasa da, bir kúni azaıady. Sol kúnderde ekonomıkanyń qurylymy qandaı bolady degendi oılaýymyz kerek. Astanaǵa keletin týrısterdiń sany kóbeıip jatyr», - dedi elorda ákimi.
