Indonezııa jaǵalaýynda sýǵa batqan paromnyń 20-dan astam jolaýshysy qutqaryldy
ASTANA. QazAqparat - Indonezııada joǵalyp ketken jolaýshylar paromynyń 20-dan astam jolaýshysy Sýlavesı aralynyń janynda ashyq teńizde anyqtaldy. Bul týraly jeksenbide jergilikti bılik habarlady.
«Qutqarý jıletterin kıip alǵan 21 adam tabyldy. Olar teńizde. Biz olardy qaýipsiz jerge shyǵaramyz», - dep atap ótti izdeý-qutqarý operatsııasynyń basshysy Rokı Azıkın. Onyń aıtýynsha, keme aýdarylý saldarynan batýy múmkin. Ol sondaı-aq paromnyń kem degende eki jolaýshysy qaza tapqanyn habarlady, olardyń múrdeleri tabyldy.
Buǵan deıin ındonezııalyq balyqshylar joǵalǵan paromnyń tórt jolaýshysyn anyqtap, qaýipsiz jerge shyǵardy, olardyń arasynda bir bala bolǵan. Olar balyq aýlaý býılaryn ustap sý betinde qalqyp júrdi.
Bortynda 100-den astam adam bolǵan parommen baılanys 19 jeltoqsanda, keme Sýlavesı aralynan 20 shaqyrym jerde bolǵan kezde úzilgen. Ońtústik Sýlavesı provıntsııasy polıtsııasynyń komıssary Frans Býrangtyń habarlaýynsha, qutqarý operatsııasyna teńizdiń qatty tolqyny kedergi keltirýde. Kemeniń bortynda 94 eresek pen 14 bala bolǵan, dep jazady TASS.
