Indonezııa jaǵalaýynda jer silkindi

ASTANA. KAZINFORM — Indonezııa jaǵalaýynda, Talaýd araldary mańynda magnıtýdasy 7,1 bolatyn jer silkinisi boldy, dep habarlaıdy Sınhýa.

Indonezııanyń meteorologııa, klımatologııa jáne geofızıka agenttigi málimetinshe, jer silkinisiniń epıtsentri Soltústik Sýlavesı provıntsııasyndaǵy Talaýd arhıpelagynyń ákimshilik ortalyǵy Melongýane qalasynan ońtústik-shyǵysqa qaraı 52 shaqyrym jerde ornalasqan. Jerasty dúmpýleriniń oshaǵy 17 shaqyrym tereńdikte bolǵan.

Seısmologtardyń deregine sáıkes, epıtsentr 3,64 gradýs soltústik endik pen 126,98 gradýs shyǵys boılyq koordınattarynda tirkeldi.

Agenttik mamandary keıingi qaıtalama dúmpýler bolýy múmkin ekenin eskertti. Qazirgi ýaqytta qıraǵan nysandar men zardap shekkender týraly aqparat túsken joq.

Buǵan deıin Japonııa aýmaǵynda magnıtýdasy 6,2 bolatyn jer silkinisi tirkelgeni habarlanǵan bolatyn.