Indonezııa jaǵalaýynda magnıtýdasy 6,7 jer silkinisi boldy
ASTANA. KAZINFORM — Bılik turǵyndardy resmı eskertýlerge qulaq asýǵa jáne saq bolýǵa shaqyryp, qaıtalama dúmpýler birneshe saǵatqa sozylýy múmkin ekenin eskertti, dep habarlaıdy Euronews.
Seısenbi kúni Indonezııada magnıtýdacy 6,7 jer silkinisi boldy. Negizgi silkinisten keıin birqatar kúshti aftershok boldy.
Jer asty dúmpýleri shamamen 400 myń turǵyny bar Palý qalasynda bir mınýttan astam ýaqytqa sozylǵan qatty diril sezdirdi. Bul eldi meken — Ortalyq Sýlavesı provıntsııasynyń ákimshilik astanasy.
Jergilikti zaqymdanýlar týraly habarlandy. Birqatar ǵımaratta jaryq paıda boldy, Sıgı okrýgi ákimshilik ǵımaratynyń tóbesi qulady, sondaı-aq jergilikti ýnıversıtet ǵımaraty da zaqymdaldy. Aýrýhanalar qaýipsizdik maqsatynda naýqastardy syrtqa shyǵardy.
AQSh Geologııalyq qyzmetiniń málimetinshe, alǵashqy jer silkinisiniń epıtsentri Palýdan shyǵys-ońtústik-shyǵysqa qaraı 46 shaqyrym jerde, oshaǵy shamamen 10 shaqyrym tereńdikte ornalasqan. Eń qatty sezilgen jerasty dúmpýleriniń magnıtýdasy 5,2, 5,0 jáne 4,9-ǵa jetti.
Indonezııa birneshe seısmıkalyq jaryq aımaqtarynda ornalasqandyqtan, onda jer silkinisteri men janartaý belsendiligi jıi bolady.
2021 jyldyń qańtarynda Sýlavesı aralyndaǵy Mamýdjý qalasynyń mańynda bolǵan 6,2 baldyq jer silkinisi kem degende 100 adamnyń ómirin qıdy, al myńdaǵan turǵyn jer silkinisiniń qaıtalanýynan qorqyp, birneshe kún dalada túnedi.
Osyǵan deıin Kýbada 5,3 baldyq jer silkinisi tirkelgeni habarlandy.
