Indonezııa jaǵalaýynda 6,7 magnıtýdaly jer silkinisi boldy

ASTANA. KAZINFORM — Indonezııada jyl saıyn shamamen 7 myńǵa jýyq jer silkinisi tirkeledi, dep jazady AZERTADJ.

AQSh Geologııalyq qyzmetiniń (USGS) derekterine sáıkes, dúısenbi kúni Indonezııanyń shyǵys jaǵalaýynda 6,7 magnıtýdaly jer silkinisi boldy. Degenmen, monıtorıng nátıjesinde tsýnamı qaýpi joq ekeni anyqtaldy. Epıtsentr Malýký shyǵys provıntsııasyndaǵy Týal qalasynan batysqa qaraı 177 shaqyrym jerde, 66 shaqyrym tereńdikte ornalasqan.

Tynyq muhıty tsýnamıden erte eskertý ortalyǵy da tsýnamı qaýpi joq ekenin málimdedi. Al Indonezııanyń geofızıkalyq agenttigi áleýmettik jelide «jer silkinisi tsýnamı týǵyzý qaýpine ıe emes» dep jazdy. Qazirgi tańda materıaldyq shyǵyn nemese adam shyǵyny týraly aqparat jarııalanǵan joq.

Indonezııa — arhıpelagtyq memleket, ol Tynyq muhıtynyń «otty beldeýi» dep atalatyn, seısmıkalyq belsendi aımaqta ornalasqan. Bul aımaq — Japonııadan Ońtústik-Shyǵys Azııa arqyly Tynyq muhıty jaǵalaýyna deıin sozylyp jatqan, lıtosferalyq plıtalar túıisetin jer.

Aıta keteıik, 2021 jylǵy qańtarda Sýlavesı aralynda bolǵan 6,2 magnıtýdaly jer silkinisinen 100-den astam adam qaza taýyp, myńdaǵan adam baspanasyz qalǵan bolatyn.

Osyǵan deıin Egeı teńizinde magnıtýdasy 4,6 jer silkinisi bolǵanyn jazǵan edik.