Indonezııa jaǵalaýynda 250 adam mingen parom órtendi
ASTANA. KAZINFORM – Indonezııanyń Shyǵys ıAva provıntsııasy jaǵalaýyndaǵy ıAva teńizinde Mutiara Santosa 2 paromynda shyqqan órt saldarynan keminde bes adam qaza taýyp, taǵy 41 adam iz-túzsiz joǵaldy, dep habarlaıdy Sınhýa.
Órt jeksenbi kúni Shyǵys ıAvadaǵy Sýrabaıa qalasynan Sýlavesı aralyndaǵy Makassar qalasyna bet alǵan Mutiara Santosa 2 paromynda shyqqan.
Indonezııanyń Ulttyq izdestirý-qutqarý agenttiginiń málimetinshe, keme bortynda shamamen 250 adam bolǵan. Órt parom Madýra araly mańyndaǵy Sapýdı aralynan soltústikke qaraı shamamen 19 teńiz mıli (35,2 shaqyrym) qashyqtyqta júrgen kezde tutanǵan. Qutqarýshylar jetkenshe keme túgelge jýyq otqa oranǵan.
Sýrabaıa qalasynyń izdestirý-qutqarý qyzmetiniń habarlaýynsha, jolaýshylardyń kóbi tilsiz jaýdan qutylý úshin teńizge sekirýge májbúr bolǵan. Olardyń birneshe ondaǵanyn mańaıdan ótip bara jatqan kemeler qutqaryp alǵan.
Oqıǵa ornyna qutqarý kemeleri, mamandar jáne qatty korpýsty úrlemeli qaıyqtar jiberildi. Іzdestirý-qutqarý jumystary jalǵasyp jatyr.
Órttiń shyǵý sebebi anyqtalýda.
Materıal Kazinform agenttigine seriktes Sınhýa agenttigi usynǵan.
Osyǵan deıin habarlaǵanymyzdaı, Marokkodan Seýtaǵa ótpek bolǵan 67 mıgrant qaza boldy.
