Indonezııa: Tamaqqa talasqan janjal saldarynan 100 mıgrant óltirildi
ASTANA. QazAqparat - Indonezııada batyp bara jatqan kemeden qutqarylǵan zańsyz mıgranttar bortta azyq-túlikke talasyp, týyndaǵan janjal saldarynan júzge jýyq adam qaza tapqanyn málimdedi.
Mıgranttardyń aıtýynsha, qaza tapqandardyń keıbiri baýyzdalsa, keıbirin asyp óltirgen, keıbirin sýǵa laqtyryp jibergen, dep habarlady Bı-bı-sı .
Basylym qazirgi ýaqytta táýelsiz kózderden olardyń aıtqandaryn rastaý múmkindigi bolmaı turǵanyn atap ótedi.
Bul rette mıgranttardyń aıtqany BAQ-tyń basqa habarlamalarymen sáıkes keledi.
Indonezııaǵa jetkizilgen 700-ge tarta mıgranttar qazir Acheh lagerinde. Sý ishpeı, ash júrgendikten, olardyń kópshiliginiń densaýlyǵy nasharlaǵan.
Mıgranttar Malaızııaǵa bet alǵan, alaıda aıtýlarynsha, olardyń jolyn malaızııalyq áskerı teńiz kúshi tejegen.
Keıbir derekterge súıensek, olardyń kemeleri eki aıǵa jýyq teńizde teńselip júrýine týra kelgen. Mıgranttar naqtylaǵandaı, zańsyz adam tasym alymen aınalysatyn komanda taıaý kúnderi bulardy tastap ketken.
Qazirde Bangladeshten, Bırmadan kelgen myńdaǵan mıgranttar teńizde qaıyqta aınalshyqtap júr. Óıtkeni Malaızııa men Taıland bıligi olardyń jaǵalaýǵa jaqyndaýyna tyıym salýda.
Olardyń basym bóligi rohındj musylmandary - olar etnıkalyq sebeptermen qýdalanǵan Mıanmadan kelgen az ult ókilderi.
Keshe Mıanma úkimeti mıgranttardyń daǵdarysqa ushyraýyna jaýapty emes ekendigin málimdedi.
