Indonezııa polıtsııasy prezıdentke jasalǵan qastandyqtyń aldyn aldy
ASTANA. QazAqparat - Indonezııa polıtsııasy dúısenbi kúni Batys ıAva provıntsııasynda prezıdent Djoko Vıdodoǵa qastandyq jasaýǵa daıyndalýǵa kúdikti 31 jastaǵy er adamdy ustady.
Bul jaıly seısenbide The Straits Times gazeti habarlady.
Basylymnyń málimetterine súıensek, er adam 19 qyrkúıekte memleket basshysy kelýi tıis Sırebon qalasynyń áýejaıyndaǵy tikushaq alańyna jaqyn jerde ustalǵan. Aty jarııa etilmeı otyrǵan kúdiktiden órtegish qospamen toltyrylǵan bes bótelke tabylǵan.
Aldyn ala tergeý amaldary kezinde kúdiktiniń DAISh lańkestik uıymymen baılanysy bar jergilikti ekstremıstik toptardyń birine kiretini anyqtalǵan. Arnaıy qyzmetter bul ekstremıstik topty Indonezııada taıaýda bolǵan birneshe lańkestik áreketterge jaýapty dep sanaıdy.
