Indonezııa musylmandary «Álem arýy» baıqaýymen kúresip álek
ASTANA. 27 tamyz. QazAqparat - Indonezııadaǵy Musylmandar uıymynyń basshysy elde «Álem arýy» baıqaýyn ótkizý jónindegi úkimet sheshimine qarsy shyqqan ǵalymdarǵa qosyldy, dep jazady muslim.kz.
Onyń aıtýynsha, batystyń jón-joralǵysyna qurylǵan bul baıqaý áıel tabıǵatyna ári adamgershilikke jat. Indonezııa halqyna berer paıdasy joq.
«Áıel tánin jalańashtap kórsetýge dinimizde tyıym salynǵan», - dedi Indonezııalyq úlemder keńesiniń joǵary laýazymdy ókili Muhıtdın Júnaıdı. Bul jaıynda avstralııalyq The Daily Telegraph habar taratty. «Biz aıtqandaı bolmaǵan kúnniń ózinde baǵyn synaýǵa kelgender etpen et bop jabysyp turatyn kıimder kıip, tánin kórsetedi», - dedi sózin tolyqtyryp.
Musylmandardyń jetekshileri el turǵyndaryn osynaý sharaǵa mán bermeýge shaqyrdy.
Belgili bolǵandaı, «Álem arýy» baıqaýy kelesi aıda kýrortty Balı aralynda ótedi. Al aqtyq syny Bogorda bolady.
Bir aıta keterligi, Indonezııa turǵyndary dinı qundylyqtarǵa meılinshe abaı bolýǵa tyrysady. Máselen, 2012 jyly ashyq-shashyq kıinip kelgeni úshin LadyGaga ánshisiniń kontserti ótpeı qalǵan bolatyn.
