Indonezııa mınıstri Muhammed Nuh Djakartada Qazaqstannyń mádenıet kúnderin ótkizýge shaqyrdy
Bul týraly búgin Astanada Indonezııanyń mádenıet kúnderiniń ashylýyna arnalǵan gala-kontsertte Indonezııanyń Bilim jáne mádenıet mınıstri Muhammed Nuh málim etti.
"Búgin eki el arasyndaǵy qarym-qatynastardyń jańa dáýiri týdy. Bizdiń elder arasyndaǵy áriptestikti odan ári tereńdete túsý qajet. Qazaqstanda Indonezııanyń mádenıet kúnderin ótkizýge úlken kómegin bergen ózimniń áriptesim - Muhtar Qul-Muhammedke alǵysym sheksiz. Men Indonezııada Qazaqstannyń mádenıet kúnderin ótkizýge shaqyramyn", - dedi M.Nuh.
"Bizdiń halyqtardyń kem degende úsh uqsastyǵy bar: birinshiden, Qazaqstan men Indonezııa álemde mańyzdy rólge ıe, ekinshiden, bizdiń mádenıetterimiz kóp túrli, kópultty jáne kópdindi eldermiz, úshinshiden, biz halyqtar arasyndaǵy mádenı áriptestiktiń tereńdeýine múddelimiz", - dep atap ótti mınıstr.
Aıta keteıik, búgin, dúısenbi kúni Astanada Indonezııanyń mádenıet kúnderiniń ashylýyna arnalǵan gala-kontsert ótken bolatyn. Oǵan QR Mádenıet jáne aqparat mınıstri Muhtar Qul-Muhammed pen Indonezııa Bilim jáne mádenıet mınıstri Muhammed Nuh qatysty.
