Indonezııa men Japonııadaǵy apattardan qazaqstandyqtar zardap shekken joq - SІM
ASTANA. QazAqparat - Indonezııadaǵy alapat jer silkinisi men Japonııadaǵy surapyl taıfýnnyń saldarynan qaıtys bolǵan nemese zardap shekkenderdiń arasynda qazaqstandyqtar joq, dep habarlaıdy QazAqparat tilshisi.
«Ózderińiz de jańalyqtardan kórip otyrǵandaı, saǵat saıyn kóz jumǵandardyń sany kóbeıip bara jatqanyn (Indonezııada -avt.) kórip otyrsyzdar. Bizdiń konsýldyń málimetine súıensek, qazirgi tańda qaıtys bolǵan nemese zardap shekkenderdiń arasynda Qazaqstan azamattary joq. Sonymen qatar, evakýatsııalaý týraly kómek surap, Qazaqstan elshiligine eshkim kelmegen. Sonymen qatar, Japonııada 30 qyrkúıekte óte joıqyn taıfýn boldy. Tabıǵı apattyń saldarynan 2 adam qaza taýyp, júzge tarta adam túrli dene jaraqattaryn alǵan. Qaıtys bolǵandar men zardap shekkenderdiń arasynda Qazaqstan azamattary joq», - dedi QR SІM resmı ókili Aıbek Smadııarov vedomstvo ǵımaratynda ótken brıfıng kezinde.
Eske sala ketsek, buǵan deıin Indonezııanyń Sýlavesı aralynda bolǵan jer silkinisi men tsýnamı saldarynan qaza tapqandar sany 1,2 myń adamnan asqanyn, al Japonııada surapyl taıfýn bolyp, osynyń saldarynan zardap shekkenderdiń sany 50-ge jetkenin habarlaǵan edik.
