Indonezııa Qazaqstan azamattaryna vızasyz rejım engizýi múmkin
ASTANA. KAZINFORM — Indonezııa Qazaqstan azamattary úshin vızasyz rejım engizip, tikeleı áýe reısterin ashýdy usynyp otyr. Bul týraly Indonezııa Respýblıkasynyń Qazaqstandaǵy jáne Tájikstandaǵy Tótenshe jáne ókiletti elshisi Mohamad Fadjrýl Rahman málimdedi.
Elshiniń aıtýynsha, pandemııadan keıin 2021 jyly Qazaqstannan Indonezııaǵa týrıster aǵyny 700 adamdy ǵana quraǵan edi. 2023 jyly bul kórsetkish 7 myńǵa jetse, bıyl 2025 jyly 25 myń qazaqstandyq Indonezııa araldaryna barǵan.
— Sondyqtan bizge Qazaqstannan keletin týrıster sanyn odan ári arttyrý qajet. Alaıda negizgi qıyndyq tikeleı áýe reısteriniń bolmaýyna jáne vıza rejımine kelip tireledi. Qazirgi ýaqytta biz Qazaqstan azamattary úshin Indonezııaǵa vızasyz kirý máselesin rettep jatyrmyz. Óıtkeni Qazaqstan Indonezııa azamattaryna vızasyz kirýge ruqsat berip otyr. Al Indonezııa ázirge tek kelý barysynda beriletin aqyly vızany ǵana usynyp otyr. Sondyqtan qazir osy vızasyz rejımdi tolyq iske asyrý baǵytynda jumystar júrip jatyr, — dedi elshi Mohamad Fadjrýl Rahman Astanada «Ǵajaıyp Indonezııa» mádenı-dıplomatııalyq keshinde.
Tikeleı áýe reısteri boıynsha elshi Air Asia jáne Air Astana kompanııalarymen kelissózder júrip jatqanyn jetkizdi.
— Qazirgi tańda Qazaqstannan Balıǵa ushý ýaqyty shamamen 10 saǵatqa jýyqtaıdy. Qazir týrısterdiń kópshiligi Almatydan Kýala-Lýmpýrǵa tikeleı reıspen 7,5 saǵat ushady, Kýala-Lýmpýrdan Balıǵa taǵy 2 saǵat ushady. Sondyqtan tikeleı reısterdiń ashylýy Balıǵa barýdy edáýir jeńildeter edi. Osy múmkindik jaqyn arada júzege asady dep úmittenemiz, — dedi Indonezııa elshisi.
Óz kezeginde ındonezııalyq týrıster Qazaqstandaǵy qysqy týrızmge, ásirese Almatydaǵy Shymbulaqqa, taý-shańǵy kýrortyna erekshe qyzyǵýshylyq tanytyp otyr. Ótken jyly Indonezııadan Qazaqstanǵa 5 myńnan astam týrıst kelgen.
Aıta keteıik, elordada Indonezııa Respýblıkasynyń Táýelsizdiginiń 80 jyldyǵyna arnalǵan «Ǵajaıyp Indonezııa» dıplomatııalyq-mádenı keshi ótip jatyr. Sharada Indonezııanyń baı ári alýan túrli mádenı murasy tanystyrylyp, dástúrli qoıylymdar men qazaqstandyq ónerpazdarmen birlesken án-bı usynyldy.
Buǵan deıin Indonezııanyń Balı aralyndaǵy qazaqtar týraly jolsapar ocherki jarııalanǵan edi.