Indonezııa Gazaǵa bitimgershilik kúshterin jiberýge daıyn

ASTANA. KAZINFORM – Indonezııa Prezıdenti Prabovo Sýbıanto BUU Bas Assambleıasynda eliniń Gazaǵa bitimgershilik kúshterin jiberýge daıyn ekenin aıtty, dep habarlaıdy TRT aqparattyq agenttigi.

— Áıelder men balalardy qosa alǵanda myńdaǵan jazyqsyz adam kóz jumdy, ashtyq pen ınfraqurylymnyń qıraýy beleń aldy. Kóz aldymyzda gýmanıtarlyq apat bolyp jatyr. Kinásiz beıbit turǵyndarǵa qarsy jasalǵan kez kelgen zorlyq-zombylyq áreketin aıyptaımyz, — dedi ol.

Sýbıanto Indonezııanyń qaqtyǵysty toqtatýǵa baǵyttalǵan halyqaralyq kúsh-jigerge qosylýǵa daıyn ekenin atap ótti. 

— Bitimgershilik kúshterin usynýǵa daıynbyz. Palestına máselesine qatysty eki memleket sheshimin qoldaýdy jalǵastyramyz. Elimiz Izraıl Palestına memleketin jáne Palestınanyń táýelsizdigin moıyndaǵan sátte Izraıl memleketin dereý moıyndaıdy jáne Izraıldiń qaýipsizdigi úshin barlyq kepildikterdi qoldaýǵa daıyn, — dedi Indonezııa Prezıdenti Prabovo Sýbıanto.

Aıta keteıik, Ulybrıtanııa, Kanada, Avstralııa jáne Portýgalııa BUU Bas Assambleıasy qarsańynda Palestınany resmı túrde moıyndaǵan bolatyn. Osydan keıin Frantsııa, Belgııa, Malta jáne Lıýksembýrg sekildi elder de Palestınany moıyndaǵanyn jarııalady.
Qazirgi tańda BUU-ǵa múshe memleketterdiń shamamen tórtten úshi Palestınany moıyndaǵan. Ótken jyly Irlandııa, Ispanııa jáne Norvegııa bul sheshimdi resmı túrde qabyldady.

Eske sala keteıik, buǵan deıin Arab elderi batystyń Palestınany moıyndaýyn qýanyshpen qabyldaǵany týraly jazǵamyz.