Indonezııa Gaza sektoryna 8 myńǵa deıin áskerı qyzmetker jiberýi múmkin
ASTANA. KAZINFORM – Gaza sektorynda Halyqaralyq turaqtandyrý kúshterin (HTK) qurý máselesi praktıkalyq talqylaý kezeńine ótti, dep habarlaıdy Kazinform agenttiginiń menshikti tilshisi.
Antaranews agenttiginiń málimetinshe, Indonezııa AQSh prezıdenti Donald Tramptyń beıbit bastamasy aıasynda kózdelgen Halyqaralyq turaqtandyrý kúshteri quramyna 5 myńnan 8 myńǵa deıin áskerı qyzmetker jiberý múmkindigin qarastyryp jatyr.
Bul týraly Indonezııa armııasy shtabynyń bastyǵy Marýlı Sımandjýntak Djakartada el prezıdenti Prabovo Sýbıantomen ótken qaýipsizdik máseleleri jónindegi keńesten keıin málimdedi, dep habarlaıdy The Times of Israel. Onyń aıtýynsha, sany 8 myńǵa deıin jetetin bir brıgada aldyn ala daıarlyqtan ótip jatyr. Indonezııalyq bólimsheler ınjenerlik jáne medıtsınalyq mindetterdi atqarýy yqtımal. Sonymen qatar mıssııanyń naqty parametrleri, onyń ishinde ornalasý aımaǵy men jiberý merzimi áli kelissózder barysynda naqtylanady.
Indonezııa úkimetiniń memlekettik hatshysy Praseto Hadı sársenbi kúni úkimet Gaza sektoryndaǵy bitimgerlik mıssııalarǵa myńdaǵan áskerı qyzmetkerdi jiberý josparyn ázirleýdi aıaqtap jatqanyn rastady.
Tempo basylymynyń habarlaýynsha, Indonezııa Ulttyq qarýly kúshteriniń qolbasshysy general Tando Býdı Revıta bitimgerlik kúshter tek qaqtyǵys aımaqtarynda jumys isteý tájirıbesi bar bólimshelerden jasaqtalatynyn atap ótti.
– Bizde tájirıbe bar. BUU-nyń Lıvandaǵy bitimgerlik mıssııasy quramynda qyzmet etken áskerı qyzmetkerlerimiz bar, – dedi ol. – Biz dál sol tájirıbeli quramdy jiberemiz. Qaqtyǵys aımaqtarynda jumys istemegen bólimsheler bolmaıdy.
Buǵan deıin Izraıldiń Kan teleradıokompanııasy aldaǵy aptalarda birneshe myń ındonezııalyq áskerı qyzmetkerdiń Gaza sektoryna kelýi múmkin ekenin habarlaǵan. Aqparatqa sáıkes, olar anklav aýmaǵyndaǵy HTK-nyń alǵashqy qatysýshylary bolýy múmkin. Sondaı-aq kúshterdiń Rafahtyń ońtústik-shyǵys bóligine ornalastyrylatyny aıtylǵan. Alaıda Indonezııa Qorǵanys mınıstrligi naqty dıslokatsııa aýdandary jónindegi málimetti joqqa shyǵaryp, operatsııa áli jan-jaqty kelisilmegenin málimdedi.
Indonezııa tarapynyń baǵalaýynsha, kópultty kontıngenttiń jalpy sany shamamen 20 myń áskerı qyzmetkerge jetýi múmkin. Sonymen birge prezıdenttiń resmı ókili naqty san men qatysý sharttary halyqaralyq mandat kelisilgennen keıin ǵana aıqyndalatynyn aıtty.
Halyqaralyq turaqtandyrý kúshterin qurý 2025 jylǵy qazanda qabyldanǵan Gaza sektoryndaǵy jaǵdaıdy retteý josparynyń alǵashqy kezeńinde qarastyrylǵan. Josparǵa sáıkes, turaqtandyrý kúshteri anklavtaǵy qaýipsizdikti qamtamasyz etip, Izraıl Qorǵanys armııasynyń qatysýyn kezeń-kezeńimen qysqartýǵa múmkindik berýi tıis.
Sonymen qatar HAMAS-ty qarýsyzdandyrý máselesi de qarastyrylǵanymen, top ázirge bul sharttardy oryndaýǵa daıyn ekenin kórsetpeı otyr. Bul halyqaralyq kontıngentti qalyptastyrý úderisin kúrdelendirip otyr.
Indonezııa prezıdenti 19 aqpanda ótetin Beıbitshilik keńesiniń alǵashqy otyrysyna qatysý úshin Vashıngtonǵa shaqyrylǵan. Alaıda saparǵa qatysty túpkilikti sheshim áli qabyldanǵan joq. Djakarta bıligi el yqtımal qatysýǵa daıyndalyp jatqanyn, biraq sońǵy sheshim mıssııa mandaty men parametrleri naqtylanǵannan keıin qabyldanatynyn atap ótti.
Indonezııa Beıbitshilik keńesiniń Jarǵysyna qol qoıǵan 19 memlekettiń biri boldy.
Buǵan deıin Memleket basshysy Qasym-Jomart Toqaev Beıbitshilik keńesin qurý bastamasyna qatysty pikir bildirgen edi.
Sondaı-aq Qazaqstannyń Beıbitshilik keńesine 1 mlrd dollar jarnasyz qosylǵany habarlanǵan bolatyn.