Indonezııa áýejaıynda Boeing ushaǵy júk kóligimen soqtyǵysyp qaldy
ASTANA. QazAqparat - Sıngapýrlik SilkAir ushaǵy Indonezııadaǵy Medan áýejaıynan ushar aldynda júk kóligimen soqtyǵysyp qaldy. Borttaǵy 163 jolaýshynyń eshqaısysy zardap shekken joq. Bul týraly TASS agenttigi habarlaıdy.
Kompanııa ókiliniń aıtýynsha, oqıǵa 23 jeltoqsan kúni bolǵan. Boeing 737 ushyp-qoný jolaǵymen qozǵalyp kele jatqanda ushaq fıýzelıajynyń orta tusyna júk kóligi soǵylǵan. Eshkim zardap shekken joq. Jolaýshylarǵa Sıngapýrden jańa ushaq aldyryldy.
Vısný Sıtıantno áýejaıynyń resmı ókili jergilikti Detik portalyna bergen suhbatynda, oqıǵa sebepteriniń birneshe nusqasy qaralyp jatqanyn, onyń ishinde kólik júrgizýshisi men ushqyshtardyń da qateligi bar ekendigin aıtqan.
