Indonezııa «Álemniń eń sulý musylman qyzy» atty baıqaýdy uıymdastyrmaq
ASTANA. 18 qyrkúıek. QazAqparat - Jaqynda Indonezııa halqy arasynda daý týǵyzdyrǵan aty shýly «Álem arýy» atty baıqaýǵa endi jaýap retinde «Álemniń eń sulý musylman qyzy» baıqaýy uıymdastyrylady.
Bul baıqaýdyń basty aıyrmashylyǵy sharıǵat talaptaryna saı ótkiziletin bolady. Baıqaýdyń aty aǵylshyn tilinde «Muslimah world» dep atalyp, jaqynda Indonezııanyń astanasy Djakartada ótkiziledi, dep habarlady muftyat.kz.
Baıqaýdyń uıymdastyrýshysy Ekı Shantı óziniń suhbatynda bylaı dep málimdedi: «Biz bul baıqaýdy «Álemniń arýy» atty baıqaýyna jaýap retinde uıymdastyrdyq. Áıel adam dinshil, sulý, sabyrly, sypaıy, názik, úlgili bolý kerek qoı. Sonymen qatar, musylman áıel din men qazirgi ómirdi birge tutas baılanystyrý múmkinshilikterin álemge kórsetýi tıis. Osy arqyly biz baıqaýlardy sharıǵat zańdaryn buzbaı-aq, ashyq-shashyq kıinbeı de ótkizýge bolady degen oımen ótkizeıik dep jatyrmyz. Bolashaqta balalarymyzǵa osy baıqaýlar arqyly tańdaý jasaýǵa erkindik beremiz. Ashyq kıinip júrgen qyzdar jaqsy ma, álde musylmansha ádemi de ásem kıingen qyz jaqsy ma? Bolashaqta jas urpaq durys tańdaý jasaıdy dep senemiz».
«Muslimah world» baıqaýyna Iran, Malaızııa, Brýneı, Bangladesh, Nıgerııa men Indonezııa elderiniń ókilderi qatysady. Tikeleı kastıngke qatysqan 500 adam arasynda eń keremet degen 20 qatysýshy iriktep alyndy. Baıqaý talaptaryna saı, ár musylman qyz Quran Kárimdi erkin oqı otyryp, oramal taǵý jolyna qalaı kelgenin aıtyp beretin bolady.
