Indıra Rystına: Jańa Konstıtýtsııada bilim men ǵylymǵa erekshe nazar aýdaryldy

ASTANA. KAZINFORM – Jańa Konstıtýtsııa jobasynda bilim men ǵylym eldiń damýy men jastardyń bolashaǵy úshin basty tirek retinde belgilendi. Bul pikirdi saıasattanýshy, EUÝ-dyń sapany qamtamasyz etý jáne ishki baqylaý jónindegi prorektory Indıra Rystına bildirdi.

Onyń aıtýynsha, Konstıtýtsııanyń 84%-y jańartylyp, 77 bapqa túzetýler engizilgen, eki jańa bólim qosylǵan. Saıası júıede birpalataly Parlamentke kóshý – qoǵamǵa tosyn jańalyq emes, sebebi sońǵy jarty jyl boıy talqylanǵan. Al bilim men ǵylymǵa jeke oryn berilýi erekshe nazar aýdarýǵa turarlyq.

– Elde 120-dan astam joǵary oqý orny jumys isteıdi, júzdegen myń stýdent bilim alady, jastar halyqtyń shamamen úshten birin quraıdy. Sondyqtan bilim men ǵylymdy Konstıtýtsııa deńgeıinde naqty bekitý – eldiń damýyna jáne jas urpaqtyń bolashaǵyna arnalǵan strategııalyq sheshim. Bul eldiń ınnovatsııalyq áleýetin nyǵaıtyp, memlekettiń básekege qabilettiligin arttyrady, - dedi Indıra Rystına.

Saıasattanýshy sońǵy bes jylda ǵylymǵa júıeli qoldaý jasalǵanyn atap ótti. Máselen qarjylandyrý artty, jańa jobalar iske qosyldy, zertteý ınfraqurylymy jańardy, jas ǵalymdarǵa áleýmettik qoldaý tetikteri jasaldy, keıbir jas ǵalymdarǵa Prezıdent úı bergen.

– Bul sharalar stýdenttik ortada da qoldaý tapty, sebebi olar tek oqytýdy emes, eldiń bolashaǵy men bilim arqyly damıtyn qoǵamdy qamtamasyz etetin joldy kórsetedi. Jańa Konstıtýtsııa eldiń damý baǵytyn aıqyndap, bilim men ǵylymdy basty tirekke aınaldyrady, - dep túıindedi saıasattanýshy.

Eske sala keteıik, buǵan deıin Oljas Bektenovtiń jańa Konstıtýtsııa jobasyn halyqqa jan-jaqty túsindirý jumystaryn kúsheıtýdi tapsyrǵanyn jazǵan edik.