Indıra Gandıdiń óltirilýi jaıyndaǵy fılmdi Úndistanda kórsetýge tyıym salyndy
ASTANA. QazAqparat - Úndistan eldiń burynǵy premer-mınıstri Indıra Gandıdiń óltirilýi jaıyndaǵy fılmniń kórsetilýine tyıym saldy.
Bul jaıynda sheteldik BAQ habarlady.
Kınosynshylardyń pikirinshe, rejısser Ravındera Ravıdiń «Qoǵam gaýhary» (Kaum De Heere) týyndysy saıası qaıratkerdi óltirýshini madaqtaıdy. Al bul qoǵamda narazylyq sharalarynyń oryn alýyna túrtki bolýy múmkin.
Mundaı sheshimdi «qoǵamdyq tártipke qaýip» tóndiretindigine baılanysty Úndistannyń fılmderdi sertıfıkattaý jónindegi ortalyq basqarmasy qabyldaǵan.
Indıra Gandı 1984 jyldyń 31 qazanynda óz rezıdentsııasynda óltirilgen bolatyn. Ony úkimet basshysy kúzet qyzmetiniń polıtseıleri Beant Sıngh pen Satvant Sıngh atqan edi. Osydan keıin eldegi taıpalar arasynda qaqtyǵystar oryn alyp, birneshe myń adam qaza tapty.
