Indıana ýnıversıteti mańyndaǵy atystan bes adam zardap shekti

ASTANA. KAZINFORM – AQSh-tyń Indıana shtatyndaǵy Blýmıngton qalasynda Indıana ýnıversıteti mańynda atys bolyp, keminde bes adam zardap shekti, dep habarlaıdy Sınhýa agenttigi.

Oqıǵa jergilikti ýaqyt boıynsha shamamen saǵat 00:25-te adamdar kóp jınalǵan Kırkvýd-avenıý kóshesinde bolǵan. Oqıǵa ornyna jetken polıtsııa qyzmetkerleri birneshe jaralanǵan adamdy tapqan.

Polıtsııa basshysy Maık Dıkhofftyń aıtýynsha, barlyq zardap shekkender aýrýhanaǵa jetkizilgen, olardyń jaǵdaıy turaqty dep baǵalanyp otyr. Buǵan deıin toǵyz adamnyń jaralanǵany habarlanǵan edi, alaıda keıin bul málimet naqtylandy.

Baqylaý kameralarynyń jazbalaryna sáıkes, oqıǵa eki áıel arasyndaǵy janjaldan bastalǵan. Janjal barysynda birneshe adam qarý shyǵaryp, olardyń ekeýi oq atqan.

Oqıǵa ornynan oq gılzalary tabyldy. Polıtsııanyń boljamynsha, oq atqandar er adamdar bolǵan. Qazirgi ýaqytta eshkim ustalǵan joq, tergeý jalǵasyp jatyr.

Ýnıversıtet ókilderi atystyń kampýs aýmaǵynan tys jerde bolǵanyn jáne stýdentterdiń bul oqıǵaǵa qatysy bolmaǵanyn málimdedi.

Eske sala ketsek, buǵan deıin AQSh-ta atys saldarynan segiz bala qaza tapqanyn jazdyq. Al sol segiz balany óltirgen kúdikti olardyń jeteýiniń ákesi bolyp shyqty.