Indıan-Ýells týrnıri: Shırek fınalǵa shyqqan Elena Rybakına ótken jylǵy kórsetkishin jaqsartty

Qazaqstannyń kóshbasshy tennısshisi tórtinshi aınalymda reıtıngide 54-oryndaǵy ulybrıtanııalyq Sonaı Kartalmen betpe-bet keldi.

Bul olardyń ózara alǵashqy kezdesýi edi. Sonaı Kartal úshinshi aınalymda sensatsııa jasap, álemniń 15-raketkasy, 2025 jylǵy Aýstralııa ashyq chempıonatynyń jeńimpazy, amerıkalyq Medıson Kızdi jeńgen edi.

Birinshi partııada Rybakına 4:1 esebimen alǵa ketti. Budan keıin Kartal esepti qysqartqanymen, Rybakına basymdylyǵyn saqtap qaldy — 6:4.

Ekinshi sette esep 4:3 bolyp, E.Rybakına jeńip jatqan mezette Sonaı Kartal jaraqatyna baılanysty matchty jalǵastyrýdan bas tartty.

Bir saǵat 19 mınýtqa sozylǵan básekede Rybakına 6 eıspen birge 5 breık-poınttyń úsheýin múlt jibermedi. Kartal 2 eıs, bir breıkpen kózge tústi.

Elena Rybakına jartylaı fınalǵa shyǵý úshin álemniń 5-raketkasy, amerıkalyq Djessıka Pegýlamen talasady. D. Pegýla tórtinshi aınalymda álemniń 12-raketkasy, Tokıo Olımpıadasynyń chempıony, shveıtsarııalyq Belında Benchıchti jolynan taıdyrdy — 6:3, 7:6 (7:5).

E.Rybakına ótken jyly Indıan-Ýellste tórtinshi aınalymnan asa almaǵan edi. Bıyl sol kórsetkishin jaqsartty. 2023 jyly osy dodada úzdik shyqqan qazaqstandyq tennısshi shırek fınalda óziniń basty qarsylastarynyń birimen kezdesedi. Odan ótken jaǵdaıda álemniń 2-raketkasy, Polsha ókili Iga Shventekpen jolyǵýy yqtımal. 

WTA Live reıtıngisinde E.Rybakına I.Shventekti ókshelep tur. Qazaqstandyq tennısshi reıtıngide polıak qyzyn qýyp jete ala ma, ol ekeýiniń aldaǵy oıyndarynyń nátıjesine baılanysty bolmaq.

Shırek fınalǵa joldama alǵan E.Rybakına qazirdiń ózinde 193 645 dollar tabys taýyp, 215 reıtıngilik upaıǵa qol jetkizdi. 

Eske sala keteıik, budan buryn Indıan-Ýells týrnırinde Elena Rybakınanyń tórtinshi aınalymǵa joldama alǵanyn jazǵan bolatynbyz.

Sondaı-aq Indıan-Ýells týrnırinde Anna Danılınanyń fınalǵa shyǵý úshin talasatyny habarlandy.