Indıan-Ýells týrnıri: Elena Rybakına jarys jolyn jalǵastyrady
ASTANA. KAZINFORM — Qazaqstannyń birinshi, álemniń 3-raketkasy Elena Rybakına Indıan-Ýells (AQSh) WTA 1000 týrnıriniń úshinshi aınalymyna shyqty.
Masters jarysyn ekinshi aınalymnan bastaǵan qazaqstandyq tennısshi álemniń 43-raketkasy, amerıkalyq Heılı Baptısti synap kórdi.
E.Rybakına 2023 jyly Indıan-Ýellste chempıon atanǵan edi. Al ótken jyly tórtinshi aınalymda reseılik Mırra Andreevaǵa 1:6, 2:6 esebimen jol bergen bolatyn. Keıin M.Andreeva úzdik shyqty.
Bıyl Aýstralııa ashyq chempıonatynda top jarǵan E.Rybakına Dýbaı WTA 1000 úshinshi aınalymynda densaýlyǵyna baılanysty matchty jalǵastyrýdan bas tartqan edi. Degenmen Indıan-Ýells dodasyna daıyndalǵanyn, ózin jaqsy sezinetinin málimdedi.
Rybakına ótken jyly Monreal masters jarysynda qarsylasyn 6:4, 6:3 esebimen tize búktirgen bolatyn.
Bul joly birinshi sette qazaqstandyq tennısshi birden breık jasaı aldy — 2:0. Biraq óz elinde oınap jatqan Baptıst tarazy basyn teńestire bildi — 4:4. Esep 5:6 bolyp, Elena dop bergende, amerıkalyq sportshy úsh setboldy paıdalana almady. Rybakına taı-breıkte múmkindigin jibermedi — 7:6 (7:5).
Ekinshi partııada Baptıst 4:2 esebimen alǵa ketti. Aqyry degenine jetti — 6:2.
Úshinshi, sheshýshi sette Rybakına breık jasap, 4:1 esebimen alǵa shyqty. Sosyn matchty taǵy bir breıkpen túıindedi — 6:2.
Eki saǵat 17 mınýtqa sozylǵan tartysty básekede Rybakına 6 eıspen birge 5 breık-poınttyń úsheýin óz esebine jazdy. Baptıst 6 eıs, 3 breıkpen (8 breık-poınt) kózge tústi.
Elena Rybakına tórtinshi aınalymǵa shyǵý úshin álemniń 28-raketkasy, ýkraınalyq Marta Kostıýk nemese reıtıngide 87-oryndaǵy amerıkalyq Teılor Taýnsendtiń qaı jeńgenimen talasady.
Taǵy bir qazaqstandyq, reıtıngide 88-oryndaǵy Aleksandr Shevchenko álemniń 17-raketkasy, norvegııalyq Kasper Rýýdqa 1:6, 6:7 (4:7) esebimen ese jiberip, úshinshi aınalymnan tys qaldy.
Eske sala keteıik, budan buryn Indıan-Ýells týrnırinde Anna Danılınanyń kelesi aınalymǵa ótkenin jazǵan edik.
