Іndettiń taralýyn toqtatpasaq, jaǵdaıdy ýshyqtyryp alamyz – QR Prezıdenti
NUR-SULTAN. QazAqparat – Іndettiń taralýyn toqtatpasaq, jaǵdaıdy ýshyqtyryp alamyz. Bul týraly búgin Memleket basshysy Qasym-Jomart Toqaev Tótenshe jaǵdaı rejımin qamtamasyz etý jónindegi memlekettik komıssııanyń otyrysynda aıtty, dep habarlaıdy QazAqparat.
«Koronavırýs pandemııasynyń zardabyn búkil dúnıe júzi tartyp otyr. Bul indet bizdiń elimizdiń ekonomıkasyna da teris yqpalyn tıgizýde. Sondyqtan, qazirgi tańda osy daǵdarysqa qarsy naqty sharalar qabyldap otyrmyz. Jalpy, búkil álem koronavırýsqa qarsy kún saıyn emes, saǵat saıyn kúres júrgizip jatyr. Álem jurtshylyǵy aıtyp otyrǵandaı, bul daǵdarys – Ekinshi dúnıejúzilik soǵystan keıin bolyp turǵan eń aýqymdy jáne asa qaýipti alapat. Men óz sózimde aıtyp óttim. Biz karantın sharalarynyń arqasynda vırýstyń jappaı taralýyn báseńdettik. Tutastaı alǵanda, jaǵdaı baqylaýda», - dedi Q.Toqaev.
Memleket basshysy atap ótkendeı, elorda men Almatydaǵy qazirgi jaǵdaı turaqty.
«Biraq, Qaraǵandy, Aqmola, Qyzylorda, Túrkistan, Jambyl oblystarynda aýrýǵa shaldyqqandardyń sany kúrt ósip ketti. Bul atqarylǵan jumystardyń jetkiliksizdigin jáne qosymsha sharalar qabyldaý qajet ekenin kórsetedi. Ońtústik – halyq tyǵyz ornalasqan óńir. Sondyqtan, indettiń taralýyn toqtatpasaq, jaǵdaıdy ýshyqtyryp alamyz. Oǵan qosa, kóktemgi egis naýqany bastaldy. «Jumyspen qamtý jol kartasy» boıynsha birqatar jobalar qolǵa alynady. Osyndaı ýaqytta eldegi epıdemıologııalyq ahýalǵa aıryqsha nazar aýdarýymyz kerek. Bul – asa mańyzdy mindet», - dedi Prezıdent.
Aıta keteıik, Memleket basshysy eldegi tótenshe jaǵdaı rejımin sáýir aıynyń sońyna deıin sozý qajet ekendigin jáne úsh megapolıs pen óńirlerdegi karantındi jalǵastyrýdy tapsyrdy.
